Kórshi úıde bala jylasa, únsiz qalmańyz – Komıtet basshysy qazaqstandyqtarǵa úndeý tastady

ASTANA. QazAqparat – Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova qazaqstandyqtardy balaǵa qarsy zorlyq-zombylyqpen belsendi kúresýge úndedi, dep habarlaıdy QazAqparat tilshisi.

«Elimizde balalardyń quqyǵyn qorǵaý baǵytynda qatań sharalar qoldanylady. Zańnama boıynsha balaǵa zorlyq-zombylyq kórsetý faktisi týraly habarlaý úshin ótinish jazýdyń qajeti joq. Jalǵyz ret qońyraý shalsa jetip jatyr.

Kórshi úıden balanyń shyńǵyrǵan, jylaǵan daýsyn estidińiz be – únsiz qalýǵa bolmaıdy. Bul jaı ǵana qolaısyz jaǵdaı emes, bul quzyrly organdarǵa habarlaıtyn jaǵdaı. Kire beris esikte ýchaskelik polıtsııanyń nómiri jazýly turǵan joq pa? Nemese mektepke qońyraý qalaı shalatynyn bilmeısiz be? Álde ortaq chatqa jaza almaısyz ba? Balaǵa qatysty zorlyq-zombylyqty habarlaýdyń túrli joly bar. Men balanyń quqyǵymen baılanysty máselege kelgende eshbir memlekettik organ beı-jaı qaramaıtynyna senimdimin», - dedi komıtet basshysy ortalyq kommýnıkatsııalar qyzmetinde.

Sondaı-aq, ol balalardyń quqyǵyn qorǵaý máselesinde BAQ ókilderiniń óte belsendi ekenin aıtyp, alǵys bildirdi.

«Sondaı jaǵdaı bola qalsa, BAQ-tyń bári habar taratady, jeliniń bári shýlaıdy. Bul jerdegi eń basty dúnıe – zábir kórgen balany sýretke túsirmeý kerek. Aty-jóni men mekenjaıyn, qaı mektep oqýshysy ekenin kórsetpeý kerek. Óıtkeni bala erteń ósedi. Onyń taǵdyry sizderdiń qoldaryńyzda. Sondyqtan osy jaǵyn eskerseńizder», - dedi Nasymjan Ospanova.