Kórshi elder Qazaqstannyń medıtsına basshylaryna qoıatyn talaptaryn kóshirip alyp jatyr – vıtse-mınıstr

ASTANA. QazAqparat – Kórshi elder Qazaqstannyń medıtsına basshylaryna qoıatyn talaptaryn kóshirip alyp jatyr. QR Densaýlyq saqta mınıstriniń birinshi orynbasary Tımýr Sultanǵazıev densaýlyq saqtaý basshylarynyń ekinshi respýblıkalyq forýmynda osyndaı málimet aıtty, dep habarlaıdy QazAqparat tilshisi.

«Qazaqstan - 14 jyl buryn medıtsınalyq uıymdardyń basshylaryna qoıylatyn biliktilik talaptaryna densaýlyq saqtaý menedjmenti men qoǵamdyq densaýlyq saqtaý salasyndaǵy magıstratýrany oqý nemese ekinshi joǵary bilimniń bolýy kerek deıtin talap engizgen TMD-daǵy alǵashqy elderdiń biri. Osy jáne basqa sharalardyń arqasynda biz sońǵy onjyldyqta densaýlyq saqtaý salasyndaǵy basshylardyń quzyrettiliginiń sapalyq turǵyda jaqsarǵanyn baıqap otyrmyz. Qazaqstannyń sala basshylaryna qoıylatyn biliktilik talaptaryndaǵy tájirıbesin kórshi elder qabyldap jatyr», - dedi vıtse-mınıstr.

Sondaı-aq, ol saladaǵy korporatıvtik qujattardy ashyq jarııalaý transparenttilikti arttyrǵanyn atady.

«Bes jyl boıy memlekettik deńgeıde korporatıvtik basqarý qujattaryn ashyq jarııalaý arqyly uıymdardyń transparenttiligin arttyrdyq. Sonyń arqasynda baqylaý keńesterin qura otyryp, korporatıvtik basqarýdyń úzdik tájirıbelerin engizdik. Salaǵa syndarly syndar aıtylyp jatqanyna qaramastan, biz korporatıvtik basqarý elementterin memlekettik sektorǵa ornyqty engize aldyq jáne basshylarǵa korporatıvtik basqarý prıntsıpterin úırettik.

Kez-kelgen reformanyń sátti iske asýyn, medıtsınalyq kómektiń sapa deńgeıin medıtsınalyq uıym deńgeıindegi basshy men kóshbasshy anyqtaıdy», - dedi Tımýr Sultanǵazıev.