Kórshi el azamattarynyń shekarany zańsyz ótkeni úshin laýazymdy adamdar jazalanady
Darhan Dilmanovtyń sózine qaraǵanda, tergeý amaldarynan keıin shekaradan zańsyz ótý faktisi boıynsha sot bolady. Atalǵan azamattarǵa qatysty budan basqa aıyp taǵylyp otyrǵan joq. Bul kúdiktilerge bir jyl bas bostandyǵynan aıyrý nemese shartty jaza da qoldanylýy múmkin.
«Memlekettik shekarany buzý Shyǵys Qazaqstan oblysy Zaısan shekara otrıady ýchaskesinde tirkeldi. Qytaı azamattary shekarany zańsyz qıyp ótken jerdi ózderi kórsetti. Biz osy málimetterdi tirkedik, sol jerde anyqtalǵan zattaı aıǵaqtar da bar. Olar bul zattar ózderine tıesili bolǵanyn rastady», - dedi D. Dilmanov.
Mundaı jaǵdaı óte sırek kezdesetinine toqtalǵan ol, «memlekettik shekara óte berik ekenin atap ótkim keledi. Bul turǵyda adamı faktor oryn alýy múmkin. Sáıkesinshe, biz tıisti tekserýdi júrgizip jatyrmyz. Osy oraıda memlekettik shekarany kúzetý boıynsha keıbir qadamdardy ózgertemiz.
Onyń aıtýynsha, atalǵan oqıǵadan Qazaqstan Shekara qyzmeti qyzmettik tekserý júrgizdi.
«Tıisti tekerý júrgizildi, barlyǵy tıisti jazasyn alady. Laýazym ıeleri jazaǵa tartylady. Olar qatardaǵy sarbazdar emes, ıaǵnı laýazymdy adamdar. Osy oraıda shekara beketiniń basshysy, shekara komendatýrasynyń komendanty bar. «Zaısan» bóliminiń komandıri qyzmetinen shettetildi», - dedi D. Dilmanov.
Budan buryn habarlanǵandaı, 10 qazanda Qytaı azamattary Murager Álimuly men Qaster Musaqanǵa qatysty QR Qylmystyq kodekstiń 392-baby 1-bóliginde qarastyrylǵan «Qazaqstan Respýblıkasynyń Memlekettik shekarasyn qasaqana zańsyz ótý» boıynsha sotqa deıingi tekserý bastaldy.