Qorshaýsyz qala: Elordada jaıaý júrginshiler men velosıped tebýshilerge qolaıly jaǵdaı jasalady

NUR-SULTAN. QazAqparat - Elordanyń ýrbanıstıka ortalyǵy «Qorshaýsyz qala» tujyrymdamasyn júzege asyrmaq. Bul jaıynda Nur-Sultan qalalyq sáýlet, qala qurylysy jáne jer qatynastary basqarmasynyń baspasóz qyzmetinen málim etti, dep habarlaıdy QazAqparat tilshisi.

Basqarma málimetinshe, bul qalanyń qoǵamdyq oryndarynyń bárinen qorshaýlardyń alynyp tastalatynyn bildiredi. Usynylǵan aqparatqa qaraǵanda, belsendiler aýdandyq ákimdiktiń ókilderimen jáne túrli nysan ıelerimen kelissóz júrgizip, qorshaýlardy alyp tastaý kelisimine qol jetkizgen.

Bul qalada ashyq ári dos peıildi orta qurýǵa múmkindik beredi. Negizgi maqsat - jaıaý júrginshiler men velosıped tebýshiler úshin qorshaýsyz qoǵamdyq keńistik qurý.

Ýrbanıstıka ortalyǵynyń jetekshisi Elnar Bazykenniń aıtýynsha, búgingi kúnge deıin Jeruıyq saıabaǵynyń qorshaýy alynyp tastalǵan.

Aldaǵy ýaqytta dál osyndaı jumys L.Gýmılev atyndaǵy Eýrazııa ulttyq ýnıversıteti tóńireginde jáne barlyq shaǵyn aýdandarda kezeń-kezeńimen júrgiziledi.