Qorshaǵan ortany qorǵaý mınıstrligin óz aldyna derbes etip qaıta qurý kerek - S. Eńsegenov
Jıynda «1998 jylǵy 6 shildedegi Qazaqstan Respýblıkasy men Reseı Federatsııasy arasyndaǵy Jer qoınaýyn paıdalanýǵa arnalǵan egemendik quqyqtardy júzege asyrý maqsatynda Kaspıı teńiziniń soltústik bóliginiń túbin mejeleý týraly hattamaǵa ózgerister engizý týraly hattamany ratıfıkatsııalaý týraly» QR Zańy qabyldanǵan bolatyn.
Depýtattyń aıtýynsha, atalǵan qujattyń ekonomıkalyq tıimdiligi bolýy ábden múmkin, alaıda mundaı kelisimder Kaspıı teńiziniń ekologııasyna alańdaýshylyqty talap etedi.
«Qazirgi tańda ǵalymdardyń aıtýynsha, Kaspıı teńizinde asa aýyr metalldardyń jınalýy normadan on jeti ese kóp eken. Iran ǵalymdary teńizdiń ekologııasy búgingi kúni eń tómengi qaýipti deńgeıine jetkenin aıtady. Onyń 95 paıyzy Kaspııdiń soltústik bóliginde, ıaǵnı, Reseı, Ázerbaıjan, Qazaqstan sektoryndaǵy munaı óndirýmen tikeleı baılanysty sekildi», - dedi S. Eńsegenov. Onyń aıtýynsha, búgingi tańda Kaspıı teńizindegi kóptegen ken oryndaryna baılanysty ekologııalyq alańdaýshylyq artyp keledi. Máselen, «Teńizshevroıl» men «Qashaǵan» kompanııasynyń ken ıgerýden bir tonnaǵa qalypta jaǵdaıda úsh keliden zııandy qaldyq shyǵarady. Osylaısha, tek osy eki kompanııanyń ózinen jylyna 171 myń tonna zııandy qaldyq shyǵady.
«Kaspııge qatysty ekologııalyq máseleler shash etekten. Ondaǵy zııandy sol óńirdiń halqy shegip otyr. Sondyqtan da, Úkimetten aldaǵy ýaqytta Qorshaǵan ortany qorǵaý mınıstrligin óz aldyna bólek vedomstvo retinde shyǵarý máselesin qarastyrýdy suraımyn. Qorshaǵan ortany qorǵaý vedomstvosynyń munaı óndiretin mınıstrliktiń qol astynda bolýy qısynǵa kelmeıdi. Burynǵy kezde ol mınıstrlik bólek bolǵannyń ózinde ekologııa týraly jaǵdaıdy qarastyrýǵa kóp kúsh kerek edi. Qazirgi kúni bul másele múldem jabylyp qaldy deýge týra keledi», - dedi S.Eńsegenov.