Qorshaǵan ortaǵa qamqorlyq týǵan jerge degen súıispenshilikti arttyrady - Toqaev
«Pavlodar men Ekibastuz jastary «EcoStudentKZ» respýblıkalyq ekologııalyq chellendjin qoldap, stýdentterdiń saıabaqtar men gúlzarlardy tazartqanynan habardarmyn. Qorshaǵan ortaǵa qamqorlyq týǵan jerge degen súıispenshilikti arttyratyndyqtan, mundaı is-sharalar kóbirek bolýy tıis dep esepteımin.
Sondyqtan, meniń usynysymmen Astana men Almaty qalalarynda «Qoqyssyz taza tabıǵat» atty jalpyulttyq aktsııa bastaldy. Bul ıgi is tabıǵatqa nemquraıly qaramaıtyn azamattardy biriktirýge arnalǵan. Bul bastamaǵa qoǵamdyq uıymdar, azamattyq belsendiler, stýdentter men eriktiler qosylatynyna senimdimin», - dedi Prezıdent.
Memleket basshysy bul turǵyda Qazaqstandaǵy volonterlardyń eńbegin atap ótti.
«Ózderińizge málim, men 2020 jyldy Volonter jyly dep jarııaladym. Bul sheshim ózin aqtady. Halyqaralyq uıymnyń qyzmetkeri retinde men volonterlyq qozǵalyspen jahandyq aýqymda aınalystym. Al, Qazaqstanda volonterlyq jastardyń ynta-jigerine ǵana negizdelgen mańyzdy kúsh dep esepteımin. Bizdiń jastarymyzdyń bul jasampaz kúshin, árıne elimizdiń ıgiligi úshin, halqymyzdyń ıgiligi úshin, atap aıtqanda, tabıǵatymyzdy taza ustap, qorǵaý úshin paıdalaný kerek», - dedi Qasym-Jomart Toqaev.
Foto:t.me/bort_01