Kórsetilgen kómek úshin memleketke bankter 1 trln teńgeden astam qarjy qaıtarady

NUR-SULTAN. QazAqparat – 2017 jyly 653 mlrd teńge kóleminde memlekettik kómek alǵan bes iri bank barlyq qarjyny 13 jyldyń ishinde qaıtarady. Bul týraly QazAqparat finprom.kz saıtyna silteme jasap habarlaıdy.

Eki jyl buryn memleket bes bankti saýyqtyrý úshin qarjylyq turaqtylyqty kóterý turǵysynda baǵdarlamany iske qosty.

2014-2017 jyldary Qazaqstannyń bank sektory birqatar qolaısyz faktorlarǵa tap boldy, onyń ishinde syrtqy konıýnktýranyń nasharlaýy yqpal etti. Sonymen birge, birqatar banktiń qarjylyq jaǵdaıynyń nasharaýy baıqalyp, bul óz kezeginde ekonomıkany nesıelendirý qarqynynyń baıaýlaýyna áserin tıgizdi.

Halyqaralyq reıtıng agenttikteri qazaqstandyq keıbir bankterge reıtıngti qaıta qarastyryp, olarǵa qatysty teris baǵa berdi. Bul ahýal kapıtaldandyrý, bankterdiń tabystylyǵy men tıimdiligi kórsetkishine qysymnyń artýyna baılanysty boldy.

Osyǵan baılanysty jeke kapıtaly 45 mlrd teńgeden kem emes ekinshi deńgeıli bankterge qoldaý sheshimi jasaldy. Bul turǵyda sheteldik qatysýmen enshiles bankter qamtylmady. Munymen qosa, aktsıonerler qatysýshy bankterdi qosymsha qarjylandyrýǵa mindetti boldy.

Baǵdarlama talaptary boıynsha qarjylyq ınstıtýttar jyl saıyn «Qazaqstan ornyqtylyq qory» aktsıonerlik qoǵamyna 4 paıyz nemese 26 mlrd teńge teńge kóleminde syıaqy tóleıdi. Aldaǵy 13 jylda memleket bankterge berilgen 653 mlrd teńgeniń ornyna 1 trln teńgeden astam qarjy alady.

Aıta keteıik, baǵdarlama ekonomıkany nesıelendirý qarqynyn kóterip, shaǵyn jáne orta bıznesti damytýǵa ońtaıly áser etti. Memlekettik qoldaýdy alǵan bes bank 2 trln teńgeden astam zaım berdi.