Koronavırýstyń jańa túri: Álem elderi shekaralaryn jaýyp jatyr

NUR-SULTAN. QazAqparat – Jenevadaǵy Dúnıejúzilik densaýlyq saqtaý uıymynyń shuǵyl otyrysynda koronavırýs mýtanty resmı VOC (qaýip týdyratyn nusqa) dep jikteldi, dep habarlaıdy QazAqparat VVS-ge silteme jasap.

«Bul nusqada óte kóp mýtatsııa bar, olardyń keıbiri asa qaýipti. Aldyn ala málimet boıynsha, bul túriniń basqa shtammdarmen salystyrǵanda qaıta juqtyrý qaýpi joǵary [VOC]. Sondaı-aq bul túri buǵan deıingi ınfektsııalarǵa qaraǵanda tez taralady», - dep atap ótti DDSU.
Juma kúni tańerteńnen bastap álem elderi shekarada shekteý sharalaryn kúsheıte bastady. Ońtústik Afrıkada tabylǵan jáne B. 1.1.529 dep atalatyn koronavırýstyń jańa qaýipti túrin óz aýmaǵyna ákelýge jol bermeýge tyrysyp jatyr.
Qazirgi ýaqytta koronavırýstyń jańa túrin 100-ge jýyq adam juqtyrǵan, olardyń kópshiligi Ońtústik Afrıkanyń Gaýteng provıntsııasynda.

Reseıden bólek, AQSh, Ulybrıtanııa, Germanııa, Italııa, Izraıl, Sıngapýr, Frantsııa, Chehııa jáne Japonııa da Afrıka elderiniń azamattaryna elge kirýge tyıym saldy.
«Omıkron» Eýropaǵa da jetken: alǵashqy jaǵdaı Belgııada tirkeldi. Eýrokomıssııa basshysy Ýrsýla fon der Lıaıen barlyq Eýropa elderin vırýstyń jańa túri tabylǵan elderden keletin týrısterdi ýaqytsha kirgizbeı turýǵa shaqyrdy.
«Qazir Eýropada bárimiz óte tez, batyl jáne úılesimdi áreket etýimiz kerek», - dedi ol.

Eske salsaq, Ońtústik Afrıka Respýblıkasynda koronavırýstyń 1.1.529 ataýy bar jańa mýtatsııasy anyqtalǵan edi.

Bul nusqa burynǵylarǵa qaraǵanda áldeqaıda juqpaly jáne vaktsınalardyń oǵan áseri tıimsiz bolýy ábden múmkin ekendigi aıtyldy. Koronavırýstyń qaýipti delingen jańa shtamyna «Omıkron» degen ataý berildi.