Koronavırýstyń ýshyqqany sonshalyq, naýqastardyń kóbi aýrýhanadan úıine oralmady – dáriger

NUR-SULTAN. QazAqparat – Malıka Aldybergenova - nevropatolog-dáriger. Búginde Ekibastuz qalasyndaǵy №3 qalalyq emhanada jumys isteıdi. Dáriger koronavırýspen kúres jaǵdaıymen jaqsy tanys. Ol pandemııa, «qyzyl» aımaq, karantın, patsıentterdiń indetpen kúresi men ólimin kórgen. Osy oraıda QazAqparat tilshisi medıtsına qyzmetkerimen tildesken edi.

Malıka Aldybergenova - jas ana. Bala kútimimen úıde otyrǵan ana taıaýda koronavırýsqa qarsy vaktsına saldyrdy.

«Koronavırýspen aýyrdym. Ókinishke qaraı, indettiń ýshyǵý saldarynan túsik jasatýǵa týra keldi. Araǵa ýaqyt salyp qaıta bala kóterdim. Qazir 2 balam bar. Ekinshi balamdy bosanǵan soń 40 kúnnen keıin koronavırýsqa qarsy vaktsına aldym. Eshqandaı keri áseri bolmady, tek ekpe alǵan jer azdap aýyrdy. Bizdiń ujym da tolyq vaktsına alǵan. Meniń jaqyndarym da ekpe saldyrdy. Sondaı-aq revaktsınatsııadan da ótti. Vırýspen kúreste vaktsınanyń yqpaly zor», - dedi Malıka Aldybergenova.

Onyń aıtýynsha, Ekibastuzǵa deıin dáriger Nur-Sultan jáne Pavlodar qalasynda jumys istegen.

«Pandemııa bastalǵanda koronavırýs juqtyrý jaıty alǵash men jumys istegen aýrýhanada tirkeldi. Bizdi birden karantınge jaýyp, aýrýhanany qorshap tastady. Men nevropatologııa bóliminde jumys istedim. Syrqattanýshylardyń sanynda shek bolmady, indettiń ýshyqqany sonshalyq, kóbi sol jerde qaıtys bolyp ketti. Men sonyń bárin óz kózimmen kórdim. Sodan keıin koronavırýsqa qarsy vaktsına alý kerektigin túsindim», - deıdi ol.

Sondaı-aq, dáriger ári jas ana qazaqstandyqtardy vaktsına alýǵa shaqyryp, koronavırýsqa qatysty feık aqparattarǵa senbeý kerektigin aıtty.

«Pandemııa qazaqstandyqtar úshin ǵana emes, álem halqy úshin kútpegen jaǵdaı boldy. Sonyń saldarynan keıbir adamdardyń júıke júıesi syr bere bastady. Qorqynysh pen úreıdiń de bolǵany ras. Adamdar agressııaǵa jol berip, dúrbeleń bastaldy. Qazir jaǵdaı retteldi, degenmen áli de bolsa vaktsına almaı júrgen adamdar bar. Osy oraıda aldymen óz densaýlyǵyn oılaǵan jón. Jeke bas amandyǵyn oılaǵan adam ekpeni óz erkimen alady degen senimdemin. Sonymen qatar koronavırýs pen vaktsınaǵa qatysty túrli alyp-qashpa áńgimelerge senbeýge shaqyramyn», - dedi M. Aldybergenova.