Koronavırýstyń úndi shtamy sımptomsyz ótýi múmkin be

NUR-SULTAN. QazAqparat – Qaraǵandy medıtsına ýnıversıtetiniń prorektory, QR DSM shtattan tys ınfektsıonısi Baqyt Kósherova «Koronavırýstyń úndi shtamy sımptomsyz formada ótýi múmkin be?» degen suraqqa jaýap berdi, dep habarlaıdy QazAqparat tilshisi.

Densaýlyq saqtaý mınıstrliginiń málimetinshe, koronavırýspen sımptomsyz aýyratyndar sany jalpy jaǵdaılardyń 30%-yn alady.

«Koronavırýspen aýyrýdyń 30%-y jalpy sımptomsyz túrde júredi. Qazirgi jaǵdaıda kóptegen aımaqtarda delta (úndi) shtamy bolýy múmkin dep aıtyp otyrmyz. Búginde koronavırýstyń sımptomsyz túri emdelmeıdi, naýqastar tek 14 kún boıy medıtsınalyq baqylaýda bolady», - dep jaýap berdi Baqyt Kósherova Ortalyq kommýnıkatsııalar qyzmetinde ótken baspasóz máslıhatynda.

Sondaı-aq, dáriger vırýstyń jańa shtamdaryn anyqtaýdaǵy vaktsınalaýdyń mańyzdylyǵyn atap ótti.

«Biz qazir úndi shtamy bar naýqastardy jıi tirkeı bastadyq, bul aýrýdyń erekshelikterin bilemiz. Ásirese, vaktsına almaǵan adamdarda aýyrlaý ótetin kórip otyrmyz. Vaktsınany ýaqytyly saldyrý óte mańyzdy. Iá, vaktsına alǵandar da aýrý juqtyrýy múmkin. Eń bastysy, aýrý jeńil túrde ótedi. Naýqas ottegige muqtaj bolmaıdy – bul óte mańyzdy», - dep túsindirdi dáriger.