Koronavırýstyń taraýyna baılanysty memleket shekarasy jabylýy múmkin be – mınıstrdiń jaýaby

NUR-SULTAN. QazAqparat – QR Densaýlyq saqtaý mınıstri Ajar Ǵınııat qaı jaǵdaıda koronavırýstyń taralýy saldarynan Qazaqstannyń shekarasy jabylýy múmkin degen suraqqa jaýap berdi, dep habarlaıdy QazAqparat tilshisi.

«Qazir ınfektsııanyń epıdemıologııasy zerttelip jatyr. Eger bir elde koronavırýstyń jańa shtamy anyqtalyp, bul indet bizdiń elde anyqtalmasa, tek sonda ǵana shekaralardaǵy shekteý is-sharalary jóninde sheshim qabyldanatyn bolady», - dedi A. Ǵınııat Ortalyq kommýnıkatsııalar qyzmetinde.

Onyń aıtýynsha, qazirgi kezde koronavırýs ınfektsııasynyń taralýynyń qaıtalanýy baıqalyp otyr.

«Vırýs túrlenip jatqanyn jáne klınıkalyq ahýal da ózgerip jatqanyn kórip otyrmyz. Osy vırýstyń jańa shtamynyń paıda bolýy jaıynda eshteńe aıta almaımyz. Qazirgi kezde «delta» vırýsy kezindegideı ókpeniń qatty zaqymdanýy saldary joq desek bolady. Sondyqtan indetti zertteý jumystaryn jalǵastyryp, tıimdi sheshimder qabyldaıtyn bolamyz», - dedi mınıstr.

Budan buryn habarlanǵandaı, álemde syrqattaný deńgeıiniń ósýimen qatar, Qazaqstanda da 20 maýsymnan bastap koronavırýs ınfektsııasyna shaldyǵý deńgeıi ósti.

Sonymen qatar, koronavırýs kóp taralyp jatqan óńirler belgili boldy.