Koronavırýstyń omıkron túri Qazaqstanda áli de bar - mınıstrlik

ASTANA. QazAqparat – QR Densaýlyq saqtaý mınıstrligi Sanıtarııalyq-epıdemıologııalyq baqylaý komıteti Juqpaly aýrýlardy epıdemıologııalyq qadaǵalaý basqarmasynyń basshysy Roza Qojapova eldegi epıdemıologııalyq jaǵdaıdy baıandady, dep habarlaıdy QazAqparat tilshisi.

Spıkerdiń aıtýynsha, búgingi kúni respýblıkada KVI+ 1 mln 400 myńnan astam naýqas jáne KVI- 90 myńnan astam jaǵdaı tirkelgen.

«Respýblıka jáne barlyq óńirler jasyl aımaqta tur. Táýligine 120-ǵa deıin KVI+ jáne 20-ǵa deıin KVI- jaǵdaıy tirkelýde, naýqastardyń 99%-y saýyǵyp shyqty. Qazaqstanda sońǵy 2 aptada aldyńǵy 2 aptamen salystyrǵanda syrqattanýshylyq 1,4 esege – ıaǵnı 754-ten 1075 jaǵdaıǵa deıin ósti», - dedi R. Qojapova Ortalyq kommýnıkatsııalar qyzmetinde ótken baspasóz máslıhatynda.

Sonymen birge KVI bar patsıentterge statsıonarlyq kómek kórsetý úshin 2 056 tósek-oryn ashylǵan, onyń ishinde ınfektsııalyq tósek-oryn – 1 747, qamtylǵany – 104 (6%), bos turǵany – 1 643 (94%).

Reanımatsııalyq tósek-oryn – 309, qamtylǵany – 8 (3%), bos turǵany – 301 (97%).

«Shtamdardy sáıkestendirý nátıjesi respýblıkada Omıkron nusqasynyń aınalymda júrgenin kórsetti», - dedi Roza Qojapova.

Aıta keteıik, 20 aqpandaǵy statıstıka boıynsha 70 adamnan koronavırýs ınfektsııasy tabylǵan edi.