Koronavırýsty juqtyrý deńgeıi bes óńirde 6 esege ósti

NUR-SULTAN. QazAqparat – Búgin Úkimet otyrysynda Densaýlyq saqtaý mınıstri Ajar Ǵınııat koronavırýsty juqtyrý deńgeıi 6 ese ósken óńirlerdi atady, dep habarlaıdy QazAqparat tilshisi.

«Baǵalaý matrıtsasyna sáıkes, Nur-Sultan qalasy «sary» aımaqta, al qalǵan óńirler «jasyl» aımaqta tur. KVI-diń ósýine baılanysty óńirlerde epıdemıologııalyq baqylaý men profılaktıkalyq jumys kúsheıtildi. Aýrýdyń eń kóp ósýi elimizdiń 6 óńirinde baıqaldy. Bul aımaqtarda sońǵy eki aptada syrqattaný 5 ese jáne odan joǵary deńgeıde ósti. Onyń ishinde Aqtóbe oblysynda, Batys Qazaqstan oblysynda, Qaraǵandy oblysynda, Pavlodar oblysynda, Aqmola oblysynda 6 ese, al Qostanaı oblysynda 5 ese kóterilip otyr», - dedi A. Ǵınııat.

Onyń aıtýynsha, aýrý 3-ten 5 esege deıin ósken óńirlerdiń ekinshi tobyna respýblıkanyń 5 óńiri endi. Aýrýdyń 3 esege deıin ósýi elimizdiń 6 óńirde anyqtaldy.

«Sońǵy aptada Almaty qalasynda KVI-ge qatysty epıdemıologııalyq jaǵdaı turaqtandy», - dedi mınıstr.

Budan buryn habarlanǵandaı, mınıstr qyrkúıek aıynda koronavırýstyń taralýy tómendeýi múmkin ekenin aıtty.