Koronavırýsty emdeýdiń ulttyq klınıkalyq hattamasy qalaı ázirlendi

NUR-SULTAN. QazAqparat - Koronavırýsty emdeýge qoldanylatyn dárilerdiń barlyǵy eksperımenttik preparat sanalady. Bul týraly Qaraǵandy medıtsına ınstıtýtynyń klınıkalyq jumystar jónindegi prorektory, COVID-19 boıynsha klınıkalyq hattamany ázirleýshi toptyń jetekshisi Baqyt Kósherova aıtty, dep habarlaıdy QazAqparat tilshisi.

«Koronavırýs indetin dıagnostıkalaý men emdeý ulttyq klınıkalyq hattamasynyń alǵashqy nusqasy osy jyldyń 3 aqpanynda jasaldy. Hattamanyń alǵashqy nusqasyn halyqaralyq usynystar bolmaǵan kezde, Dúnıejúzilik densaýlyq saqtaý uıymy eshqandaı nusqaýlyq shyǵarmaǵan kezde ázirlegen edik. Sodan beri shamamen 8 aı ótti. Biz dıagnostıkalaý men emdeýdiń klınıkalyq hattamasyn 10 ret ózektendirdik. Qazirgi jaǵdaıda koronavırýs ınfektsııasyn emdeýge ınfektsıonıster, anestezıologtar, reanımatologtarmen qatar ózge sala dárigerleri de tartylady», - dedi medıtsına ǵylymdarynyń doktory koronavırýstyń ekinshi tolqynyn talqylaýǵa arnalǵan onlaın jıynda.

Osy rette ol maýsym men shilde aıynda elimizde oryn alǵan indetke shaldyǵý kórsetkishiniń belgili bir deńgeıde sabaq bolǵanyn aıtady.

«Óte kúrdeli bolǵanyna qaramastan dárigerler bizdiń hattamany qoldandy. Barlyq medıkamentter koronavırýs ınfektsııasyn dıagnostıkalaý jáne emdeýdiń ulttyq klınıkalyq hattamasyna sáıkes satyp alyndy. Hattama jasaý - úlken eńbekti qamtıtyn jumys. Biz koronavırýs ınfektsııasyn emdeýde qoldanylatyn halyqaralyq tásil men úzdik tájirıbeni qoldanamyz. Búgin ǵana Dúnıejúzilik densaýlyq saqtaý uıymynyń sarapshylarymen onlaın kezdesý ótkizdik. Olar bizge koronavırýs indetin emdeýge qoldanatyn barlyq preparattyń esperımenttik dári-dármek ekendigin aıtyp otyr. Búgingi kúni olardyń 100 paıyz tıimdiligi dáleldenbegen», - dedi Baqyt Kósherova.