Koronavırýstan jazylǵandar arasynda ońaltýdan ótkender nelikten az

NUR-SULTAN. QazAqparat – QR Densaýlyq saqtaý vıtse-mınıstri Ǵınııat Ajar Ortalyq kommýıkatsııalar qyzmetinde ótken brıfıngide koronavırýstan jazylǵan azamattardyń arasynda ońaltý qyzmetin alǵandar nelikten az ekenin túsindirdi, dep habarlaıdy QazAqparat tilshisi.

«Koronavırýs ár adamda árqalaı ótedi. Aýyr túrimen aýyrǵandar bar. Ondaı adamdar asqynýlary men sımptomdaryn aıtyp, ýchaskelik dárigerlerge kóp júginip jatyr. Ýchaskelik dárigerler mınıstrliktiń tıisti buıryǵy boıynsha naýqastyń satýratsııasyn, ókpesinde bolǵan ózgeristerdi, basqa da aǵzalarǵa qanshalyqty áser etkenin tekserý kerek. Sol tekseristerge qarap, ońaltý sharalaryn ambýlatorlyq nemese statsıonarlyq deńgeıde alý kerektigin anyqtaıdy.

Mınıstrliktiń buıryǵynda aýrýdan jazylyp shyqqan adamnyń aǵzasynda qandaı ózgerister bolǵan kezde qaıda jiberiletini tolyq jazylǵan. Búgingi tańda 16 myńnan astam adam ońaltýdan ótti. Qarajat qarastyrylǵan. Ońaltýdan ótemin degen adamdarǵa búginde eshqandaı kedergi joq», - dedi vıtse-mınıstr.

Sondaı-aq, ol eldegi kópbeıindi aýrýhanalardyń vırýspen kúreske jappaı tartylýy áserinen, jazylǵan naýqastardy ońaltý sharalaryna atsalysa almaǵynyn eske saldy.

«Iá, 16 myń degen jazylyp shyqqan adamdarǵa qaraǵanda az bolýy múmkin. Qazirgi tańda ońaltýmen kópbeıindi aýrýhanalar, keıbir sanatorııler aınalysyp jatyr. Olar jergilikti qordyń fılıalymen kelisimshartqa otyryp, ońaltý sharalaryn ótkizedi. Keıingi 3 aıdyń ishinde koronavırýstyń úlken tolqyny bolǵanyn bilesizder. Kópbeıindi aýrýhanalardyń kóbi shuǵyl medıtsınalyq kómekke jumyldyrylǵandyqtan, kóp adamdy ońaltýmen qamtı almady», - dedi Ajar Ǵınaıat.

Al Densaýlyq saqtaý mınıstriniń birinshi orynbasary Marat Shoranovtyń aıtýynsha, koronavırýstan ońaltý sharalaryna tartylǵan adamdardyń sany 16 myńnan kóp.

«16 myń degende, «kovıd pnevmonııasyn» ótkergender kóbinese statsıonarda ońaltýdan ótti. Budan bólek ambýlatorlyq nemese sanatorıı-kýrorttyq ońaltý bar. Mysaly, tynys alý gımnastıkasy men taza aýada dem alý da ońaltý sharasynda usynylǵan. Emhanalar men ambýlatorlyq deńgeıde jasalatyn sharalar bar. Sondaı-aq, úshinshi kezeńde, ıaǵnı ońaltý uıymdarynyń deńgeıinde jasalatyn sharalar bar. Ońaltýdyń birinshi kezeńi emdelip jatqan kezde-aq júrgiziledi. 16 myń dep otyrǵanymyz osy birneshe deńgeıdiń bir túri ǵana», - dedi mınıstrdiń birinshi orynbasary.