Koronavırýstan qaıtys bolǵandardy jerleý týraly arnaıy qaýly shyǵady
Bul týraly QR Aqparat jáne qoǵamdyq damý mınıstri Dáýren Abaev «Habar 24» telearnasynyń tikeleı efırinde málimdedi.
«Koronavırýstan adam qaıtys bolýyna baılanysty jýrnalıster marqumdy qalaı jerleý kerektigi týraly surap jatyr. Búgin keshke nemese erteń tańerteń bas sanıtarlyq dárigerdiń resmı qaýlysy shyǵady. Onda qatań saqtalýy kerek erejeler kórsetiledi. Dárigerler aıtqan talaptardy qatań saqtaý qajettigi týraly Qazaqstan musylmandary dinı basqarmasy men Pravoslavıe shirkeýi tıisti pátýa men eskertýler ázirledi.
Sonymen birge, mınıstr koronavırýs ınfektsııasynan keshe qaıtys bolǵan áıel týraly pikir bildirdi.
«Bizden tańerteń qaıtys bolǵan áıeldiń dıagnozyn nege keshke habarlaǵanymyzdy surap jatyr. Ólimniń naqty sebebi keshki ýaqytta ǵana anyqtaldy jáne tez arada buqaralyq aqparat quraldaryna habarlandy», - dedi D. Abaev.
Aıta keteıik, koronavırýs ınfektsııasymen Nur-Sultan qalasy boıynsha 60 adam, Almaty qalasynda – 48 adam, Qaraǵandy qalasynda - 4, Jambyl oblysynda -3 adam, Atyraý oblysy - 3 adam, Shymkent qalasynda - 2 adam, Almaty oblysynda - 1 adam, Aqtóbe oblysynda - 1 adam, Soltústik Qazaqstan oblysynda - 1 adam, Aqmola oblysynda - 1 adam, Pavlodar oblysynda - 1 adam, jalpy 125 naýqas tirkeldi.
Buǵan deıin Dáýren Abaev karantın rejımi kúsheıtilgen kezdegi kóshede júrý talaptaryn túsindirgen edi.