Koronavırýstan emdeý nysandarynyń qurylysyn tekserý qajet - depýtattar
«Keıbir málimetterge sáıkes, BI Group jekelegen koronavırýs gospıtalderin salý kezinde óńirlerde buzylǵan ǵımarattardyń qurylys materıaldaryn paıdalanǵan. Atap aıtqanda, Atyraý oblysynyń Opornyı kentinde TShO qyzmetkerlerine arnalǵan jataqhana bólshektelgen. Al qurylys materıaldary quny 5,5 mlrd teńge bolatyn modýldi koronavırýs aýrýhanasyn salý úshin Almatyǵa jiberilgen. Joǵaryda atalǵan eldi meken Atyraý qalasynan shamamen 300 shaqyrym jerde ornalasqan», - dedi Jambyl Ahmetbekov Májilistiń jalpy otyrysynda Úkimet basshysynyń orynbasary Roman Sklıardyń atyna joldaǵan saýalynda.
Sonymen qatar depýtat Shymkentte jáne Almatyda eki modýldi aýrýhananyń sapasyz salynǵanyna, qarajattyń orynsyz jumsalýyna baılanysty sybaılas jemqorlyqqa qarsy qyzmet is qozǵalǵanyn atap ótti. Al Almaty gospıtalin salý barysynda memleketke shyǵyn kelgenin aýdıtorlyq tekserý rastady. Tergeý nátıjesi áli jarııalanǵan joq.
Osyǵan baılanysty ol Qazaqstan halyq partııasynyń depýtattary atynan tıisti usynystaryn jarııalady.
Depýtattyń paıymynsha, 2020-2021 jyldary BI Group óńirlerde koronavırýs gospıtalderin qalaı salǵanyn, olardyń qalaı jumys istep turǵanyn, medıtsınalyq qyzmet kórsetý sapasyn jiti tekserýi kerek.
«Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıteti, Qazaq qurylys jáne sáýlet ǵylymı-zertteý men jobalaý ınstıtýty sarapshylaryn tarta otyryp, 2020-2021 jyldary BI Group óńirlerde salǵan koronavırýsqa arnalǵan nysandardyń qurylysynyń smetalyq qunynyń sapasy turǵysynan egjeı-tegjeıli jáne ashyq kásibı aýdıt júrgizýi kerek», - dedi J. Ahmetbekov.