Koronavırýstan emdelgennen keıin densaýlyqty qalaı kútý kerek – professor keńesi

NUR-SULTAN. QazAqparat - Medıtsına ǵylymdarynyń doktory, professor, Qazaqstan Respýblıkasy Ulttyq Ǵylym akademııasynyń akademıgi, Qazaqstandyq reprodýktıvti medıtsına qaýymdastyǵynyń prezıdenti Vıacheslav Lokshın COVID-19-ǵa qatysty suraqtarǵa jaýap berdi. Onyń aıtýynsha, koronavırýspen aýyrǵan jaǵdaıda qorqynyshqa boı aldyrmaı vırýstan qorǵaıtyn qajetti sharalardy jyldam qabyldap, áreket etý kerek, dep habarlaıdy QazAqparat tilshisi.

«Tumaýdyń qozdyrǵyshy tumaý týdyrsa, koronavırýsty RNQ vırýsy týdyrady. Bul ártúrli organnyń tamyrlaryna zaqym keltiredi jáne bul tynys alý joldarynan bastap ókpeniń, baýyrdyń, búırektiń, mıdyń zaqymdanýyna ákep soǵady. Tumaý da pnevmonııamen aýyrýǵa sebepshi bolýy múmkin, biraq koronavırýstyń juǵý qaýpi tumaýdan da joǵary. Tumaý vırýsy ókpeniń qabynýyna kóbirek áser etse, koronavırýs qantamyrǵa, qannyń uıyp qalýyna kóbirek áser etedi. Koronavırýstyń tumaýdan aıyrmashylyǵy – ol balalar men jastardan góri egde jastaǵy adamdarǵa kóbirek zııanyn tıgizedi», - deıdi Vıacheslav Lokshın.

Onyń aıtýynsha, kez kelgen qabyný jaǵdaıynda IgM antıdenesi, odan keıin IgG antıdenesi paıda bolady. Al koronavırýs jaǵdaıynda aldymen IgG antıdenesi, odan keıin ǵana IgM antıdenesi paıda bolady.

«Qazirgi ýaqytta antıdeneni dıagnostıkalaý ádisterinde sezimtaldyq boıynsha aıyrmashylyqtary bar ekeni aıtylady. Jalǵan oń nátıjeli jáne jalǵan teris nátıjeli qorytyndy shyǵýy múmkin. Qoronavırýsqa qarsy antıdene jáne ımmýnıtet qalyptasatyny sózsiz, biraq onyń qanshalyqty uzaq ýaqytqa qalyptasatyny týraly aıtý – qıyn. Koronavırýspen qaıtalap aýyrǵan jaǵdaılar sırek kezdesetinin kórip otyrmyz. Mysaly, tumaýdy da qaıtalap juqtyryp alý múmkin, sebebi tumaý men koronavrıýsqa mýtatsııaǵa ushyrap otyrady», - deıdi professor.

Vıacheslav Lokshın koronavırýs ınfektsııasyn juqtyrǵan jaǵdaıda qorqynyshqa boı aldyrmaý kerektigin aıtty. Qorqynyshqa boı aldyrǵan kezde ımmýnıtet qyzmeti buzylyp, adam ózin basqarý qabiletinen aıyrylady. Onyń aıtýynsha, qazirgi ýaqytta dárimen emdeý koronavırýs indeti bastalǵan kezge qaraǵanda áldeqaıda jeńil. Qabynýǵa qarsy paratsetamol, aspırın jáne basqa da dárilerdi qabyldaýdyń qajeti joq. bul dári-dármekterdiń koronavırýsty emdeýge áseri qandaı bolatyny dáleldenbegen.

«Eń bastysy – kóp mólsherde ystyq sý ishý kerek. Dene qyzýyn túsirý úshin paratsetamol qoldanyp, tósekte jatý kerek. Jatqan bólmeni jeldetip, D dárýmeni men basqa da polıdárýmen keshenin ishý kerek. Eger dert pnevmonııaǵa ulasyp ketse, dáriger bakterııaǵa qarsy dári-dármekter jazyp berýi múmkin. dárigerdiń ruqsatynsyz dári-dármekterdi orynsyz qabyldaı berýge bolmaıdy», - deıdi ol.

Vıacheslav Lokshın ortasha nemese aýyr túrde aýyrǵan jaǵdaıda qannyń uıýy men baýyr qyzmetine kóńil bólý kerek. Qant dıabetimen aýyratyndar negizgi aýrýdyń asqynyp ketpeýine nazar aýdarýy qajet.

«Vırýs tamyrlardyń qabyrǵasyna áser etedi, sondaı-aq qannyń uıyp qalýyna sebepshi bolady. Ondaı jaǵdaıda ókpe, baýyr, búırek sııaqty organdardyń qyzmeti buzylady», - deıdi ol.

Ol qazaqstandyqtarǵa tumaýǵa qarsy ekpe jasatýǵa keńes berdi. 65 jastan asqandar pnevmokokqa qarsy vaktsına egilýi tıis.

«Karantın áli aıaqtalǵan joq ekenin esten shyǵarmaýymyz kerek. Qoǵamdyq oryndarda medıtsına maskasyn taǵyp, áleýmettik qashyqtyq saqtap, jeke bas gıgıenasyn saqtaýǵa mindettimiz», - deıdi ol.