Koronavırýspen kúres: QR SІM bir jylda 33 myń qazaqstandyqtyń oralýyna kómektesti

NUR-SULTAN. QazAqparat – Bir jyl buryn COVID-19 koronavırýs ınfektsııasy taralǵan alǵashqy kúnderi-aq QR Syrtqy ister mınıstrligi sheteldegi azamattarymyzdyń ómiri men densaýlyǵyn qorǵaý úshin túrli baǵyttarda eńbek etti. Mınıstrliktiń baspasóz qyzmeti COVID-19 pandemııasy kezeńinde atqarylǵan jumysty baıandady, dep habarlaıdy QazAqparat tilshisi.

Atap aıtqanda, Qazaqstan azamattaryna konsýltatıvtik kómek kórsetý úshin syrtqy saıası vedomstvo janynan jedel shtab quryldy, ol táýlik boıy elektrondyq poshtaǵa jáne jedel jeli telefondaryna kelip túsetin saýaldardy qarastyrdy. Shtabtaǵy jedel jeliniń úsh nómiri de – 72-00-46, 72-00-47, 72-05-49 jáne [e-mail] poshtasy áli jumys istep tur.

«QR SІM ortalyq apparaty men shet elderdegi mekemeler qyzmetkerleriniń úılesimdi jumysy arqyly 2020 jylǵy 2 aqpannan bastap qazirgi kúnge deıin álemniń 72 elinen 33 myńnan astam QR azamatyn elge qaıtarýǵa járdem kórsetilgen. Osy maqsatta 424 charterlik, arnaıy jáne turaqty avıatsııalyq, avtobýs jáne parom reısteri paıdalanyldy. QR Densaýlyq saqtaý mınıstrligimen jáne Qorǵanys mınıstrligimen birlesip, aýyr syrqattanǵan qazaqstandyqtardy sanıtarlyq jáne áskerı-kólik avıatsııasymen jetkizýge kómek kórsetildi», - delingen mınıstrlik habarlamasynda.

SІM kórshiles memleketterdiń azamattary úshin Qazaqstan arqyly tranzıttik dálizge (temirjol jáne avtobýs kóligimen) ruqsat berýdi turaqty túrde uıymdastyrdy. Shet memleketterge olardyń azamattary úshin repatrıatsııalyq áýe reısterin júrgizýge jáne Qazaqstan aýmaǵynan gýmanıtarlyq júkti tasymaldaýǵa kómek kórsetildi. Mysaly, QR SІM kómegimen elimizdiń aýmaǵy arqyly 40 myńnan astam Ózbekstan azamaty, 13 myńnan astam Qyrǵyzstan azamaty jáne 3 myńnan astam Tájikstan azamaty tasymaldanǵan.

«SІM qyzmetindegi bólek blok retinde – sheteldik áriptesterimizdiń gýmanıtarlyq kómekterin jetkizý, tájirıbe almasý úshin densaýlyq saqtaý salasyndaǵy sheteldiń jetekshi mamandarymen beınekonferentsııa jasaý máseleleri turdy. Sondaı-aq, syrtqy saıası vedomstvonyń qyzmetkerleri otandyq medıtsına qajettilikteri úshin belgili bir dári-dármek pen arnaıy jabdyqtardy jetkizý boıynsha sheteldik seriktestermen kelissózder protsesine tikeleı qatysty. Mınıstrlik múddeli memlekettik organdarmen birlesip TJ rejımi kezeńinde QR Memlekettik shekarasyn kesip ótý tártibiniń jobasyn ázirledi. Eldegi tótenshe jaǵdaı rejımi aıaqtalǵan soń «2020 jylǵy 11 mamyrdan bastap karantın sharalary kezeńindegi QR Memlekettik shekarasyn kesip ótý tártibi» pysyqtalyp, qabyldandy», - deıdi mınıstrlik.