Koronavırýspen kúres: Karantın ózgeristeri men bas memlekettik sanıtar dárigerdi taǵaıyndaý
Qujatqa sáıkes tıisti jeńildikter engizildi. Balalar kabınetterinde, túzetý ortalyqtarynda bilim berý toptary 5-ten 15 adamǵa deıin ulǵaıtyldy. Memlekettik organdarda, ulttyq kompanııalarda jáne ózge de uıymdarda, sondaı-aq kásipkerlik sýbektilerinde qyzmetkerlerdiń keminde 50 paıyzy qashyqtan jumys isteý nysanynda bolýy tıis.
Budan bólek, ashyq aýada jáne ujymdyq is-sharalardy ótkizbeı, zalda 50-den aspaıtyn oryn sanymen qoǵamdyq tamaqtaný nysandarynyń jumys isteýine ruqsat berildi.
QR DSM Taýarlar men qyzmetterdiń sapasy men qaýipsizdigin baqylaý komıtetiniń juqpaly aýrýlardy epıdemıologııalyq qadaǵalaý basqarmasynyń basshysy Roza Qojapova demalys kúnderi jumysy shektelgen jáne ruqsat etilgen nysandar týraly aıtty.
«Demalys jáne mereke kúnderindegi shekteý sharalaryna toqtalsaq, saýda úıleri, saýda oıyn-saýyq ortalyqtarynyń jumysyn toqtata turý burynǵysynsha saqtalady. Odan basqa, jabyq azyq-túlik jáne azyq-túlik emes bazarlarynyń jumysyn toqtata turý boıynsha shekteý sharalary da saqtalady», - dedi R. Qojapova.
Sonymen qatar ol demalys jáne mereke kúnderi jumysy ruqsat etilgen nysandarǵa toqtaldy. Osy oraıda sulýlyq salondaryna, shashtarazdarǵa, kosmetologııa qyzmetin kórsetetin nysandarǵa, fıtnes jáne sporttyq saýyqtyrý oryndaryna, basseınderge, trenajer zaldaryna, sport keshenderine, saýnalarǵa qatysty shekteýler alyndy. Munymen qosa, dinı nysandarǵa jumys isteýge ruqsat etildi.
Aıta keteıik, elderdiń sanaty jáne áýe reısterimen keletin jolaýshylarǵa qatysty túsinik berildi.
«Áýe reısteri boıynsha ózgerister engizildi. Endi birinshi sanatqa 12 el engizildi. Olardyń qatarynda QHR, Taıland, Mońǵolııa, Malaızııa, Mysyr, Gonkong, Ońtústik Koreıa, Japonııa, Sıngapýr, Germanııa, Belarýs, Ázerbaıjan bar. Osy elderden kelgen jolaýshylar termometrııa men saýalnamadan ótedi», - dedi R. Qojapova.
Ekinshi sanatqa 21 el engizildi. Osy elderden saparlap kelgender termometrııa men anketalaýdan bólek, PTR ádisimen zerthanalyq tekserýdiń teris nátıjesi bar COVID-19-ǵa tekserilgeni týraly anyqtama usynýy kerek.
Adamdarǵa koronavırýstyń qaıta juǵýy tirkelmedi
«Qazaqstanda koronavırýs ınfektsııasyn qaıta juqtyrý jaǵdaılary tirkelmedi. Bul jańa ınfektsııa bolǵandyqtan, onyń qaıtadan juǵýy múmkindigi týraly naqty aıta almaımyz. Ókinishke qaraı, bul suraqqa eshbir elde naqty jaýap berilmeı otyr. Osy oraıda koronavırýspen aýyrǵan adam uzaq baqylaýda bolǵan kezde ǵana anyqtalýy yqtımal», - dep túsindirdi R. Qojapova.
Mınıstrlik ókilderi kúndizgi dástúrli oqytý tártibine qatysty qazir naqty jaýap aıta almaıtyndaryn jetkizdi. Maýsym aıynda barlyq shekteýler alynǵan kezde indetke shaldyǵý deńgeıi óskenin jaqsy bilemiz. Osy oraıda kún saıyn indetke qatysty ahýalǵa monıtorıng jasalýda.
Aıta keteıik, mektepterdegi kezekshi synyptarda balalar arasynda indet juqtyrý jaǵdaıy tirkelmegen.
«Oqý jyly bastalǵaly muǵalimder men oqýshylar arasynda indettiń taralýy baıqalmady. Ekinshi toqsanda oqytýdyń qashyqtan bolýy múmkindigine qatysty naqty aıta almaımyz. Bul jaıynda oqý jylynyń ekinshi toqsany jaqyndaǵan kezde ǵana sheshemiz», - dedi basqarma basshysy.
Budan bólek, QR Densaýlyq saqtaý mınıstrliginiń resmı ókili Baǵdat Qojahmetov Kavasakıge uqsas sındrommen aýyrǵan balalardyń sany Qazaqstan boıynsha 35-ke jetkenin aıtty.
«Al, sońǵy 7 kúnniń ishinde birde-birde bir balada Kavasakı sındromy anyqtalǵan joq. 35 balanyń 31-i aman-esen emdelip, úılerine qaıtty. Qalǵan 4 bala qazirgi ýaqytta em alyp jatyr», - dedi resmı ókil.
Emdelip shyqqan 31 bala ýchaskelik dárigerlerdiń baqylaýyna alynǵan.
Alekseı Tsoıdyń DDSU Eýropalyq óńirlik komıtetindegi tóraǵalyǵy
Jaqynda QR Densaýlyq saqtaý mınıstri Alekseı Tsoı DDSU Eýropalyq óńirlik komıtetiniń 70-sessııasynyń tóraǵasy bolyp saılandy.
«Alekseı Tsoıdyń tóraǵa bolyp saılanýyna toqtalsaq, ol joǵary mártebe bolyp sanalady. Daýys berý tártibi qupııa ótti. Bul óz kezeginde mınıstrdiń Eýropa men Azııa óńirindegi áriptesteri arasynda aıtarlyqtaı joǵary bedelge ıe ekenin bildiredi... Qazaqstan emdeýdiń jańa ádisteriniń kózi bolýy múmkin, sondaı-aq medıtsına salasynda ınnovatsııalyq sheshimderdiń aldyna shyǵýy yqtımal», - dedi resmı ókil.
Sonymen qatar ol elimizde halyqaralyq deńgeıdegi túrli keńester men kezdesýler ótetinin atap ótti.
Munymen qosa B. Qojahmetov elimizde QR Bas memlekettik sanıtar dárigeri nege aýysqanyn túsindirdi.
«Bul qadam Bas sanıtar dárigeriniń mártebesin kóterý maqsatynda jasalǵanyn atap ótken jón. Ózderińiz bilesizder, endi Bas sanıtar dáriger vıtse-mınıstr laýazymyn da qosa atqarady. Osy sharalar bul salaǵa erekshe nazar aýdarýǵa jáne Qazaqstanda sanıtarlar men epıdemıologtardyń jumysyn jaqsartýǵa yqpal etedi», - dedi ol.
Aıta keteıik, osy aptada QR Úkimetiniń qaýlysymen Erlan Ańsaǵanuly Qııasov QR densaýlyq saqtaý vıtse-mınıstri – QR Bas memlekettik sanıtar dárigeri laýazymyna taǵaıyndaldy. h
Buǵan deıin atalǵan Bas memlekettik sanıtar dárigeri qyzmetin Aıjan Esmaǵambetova atqarǵan edi.