Koronavırýspen kúres: Dári-dármek qory kóbeıip, baqylaý kúsheıdi
Ózderińiz biletindeı, koronavırýs ınfektsııasyn juqtyrǵandar sanynyń ósýine baılanysty maýsym aıynyń sońy men shilde aıynyń basynda dári-dármek tapshylyǵy boldy. Bul tapshylyq bólshek saýda jelisinde kórinis tapty.
QR DSM sanıtarlyq-epıdemıologııalyq baqylaý komıteti tóraǵasynyń orynbasary Nurlybek Asylbekovtyń aıtýynsha, naryqqa dári-dármekti ákelýdi ári ony qoljetimdi etý úshin mınıstrlik ruqsat berý qujattaryn berý rásimderin jeńildetti.
«Sonymen qatar, koronavırýstyń yqtımal ekinshi tolqyny jaǵdaıynda óńirlerde suranysqa ıe dárilik preparattardy satyp alý úshin kóterme dıstrıbıýtorlarǵa qaıtarymdy negizde qarajat bólý turǵysynda turaqtandyrý qorlary uıymdastyryldy. Budan basqa, Farmatsevtıkalyq baqylaý komıteti óńirlerdegi kóterme dıstrıbıýtorlarda, bólshek saýdada neǵurlym suranysqa ıe dárilik zattardyń, medıtsınalyq zattardyń bolýyna monıtorıngti turaqty negizde júrgizip otyr», - dedi komıtet ókili Ortalyq kommýnıkatsııalar qyzmetinde.
Osy oraıda monıtorıng nátıjelerin taldaý barysy bıylǵy 15 shildeden 9 qarashaǵa deıin kóterme saýda qoımalary men dárihanalarda antıbıotıkter 3,9 ese, vırýsqa qarsy preparattar 3,2 ese, antıkoagýlıanttar 32 eseden astam, maskalar 2,3 ese jáne basqa da dárilik zattar qorynyń ósýin kórsetti.
«Qazirgi kezde dárihanalarda halyqtyń dárilik zattarǵa qajettiligin qamtamasyz etý úshin preparattar jetkilikti», - dedi Asylbekov Nurlybek.
Aıta keteıik, Memleket basshysynyń dári-dármek baǵasynyń negizsiz ósýine jol bermeý tapsyrmasyn oryndaý maqsatynda dárilik zattardyń baǵasyn baqylaýdy qamtamasyz etý turǵysynda oblystar men respýblıkalyq mańyzdaǵy qalalarda monıtorıngilik toptar quryldy. Olardyń quramyna bizdiń komıtettiń aýmaqtyq bólimsheleriniń, jergilikti atqarýshy ári quqyq qorǵaý organdarynyń ókilderi engizildi. Monıtorıngilik toptarmen 1640-tan astam dárihana qamtylyp, shekti baǵadan asyp satylǵan dárilik zattardyń 199 ataýy anyqtaldy.
Bıylǵy 15 shildeden 9 qarashaǵa deıin 174 mln teńge somasyna shekti baǵanyń artýynyń 876 faktisi, 39,4 mln teńge somasyna dárilik zattardy zańsyz ótkizýdiń 347 faktisi anyqtaldy. Munymen qosa, 1223 ákimshilik hattama toltyrylyp, 213 mln teńgeden astam somada aıyppul salyndy. Zańsyz aınalymnan 10 mln-nan astam dári-dármek pen medıtsınalyq zattar alyndy.
«SQ-Farmatsııa» esep berdi
Sonymen qatar, Ortalyq kommýnıkatsııalar qyzmetinde «SQ-Farmatsııa» JShS-nyń basqarma tóraǵasy Erhat Esqalıev koronavırýsqa qarsy preparattarmen qamtamasyz etý jaıynda baıandady.
«Vedomstvoaralyq komıssııanyń tapsyrmasy boıynsha koronavırýstyń jańa tolqynyna daıyn bolý úshin eldiń barlyq medıtsınalyq uıymdarynda aılyq qordy qalyptastyrý týraly sheshim qabyldandy. Qazirgi kezde Biryńǵaı dıstrıbıýtor 20 mlrd teńgeden astam somaǵa 91 túrli dári-dármek jóneltti, onyń orny jedel túrde toltyrylýda», - dedi E. Esqalıev.
Pnevmonııa, KVI-ge shaldyqqan naýqastardy antıbıotıktermen jáne qyzýdy túsiretin tegin ambýlatorııalyq dári-dármekpen qamtamasyz etý uıymdastyryldy. Osy oraıda 5 ataý – qyzýdy túsiretin Paratsetamol jáne Ibýprofen preparattary, Rıvaroksaban, Apıksaban jáne Dabıgatran antıkoagýlıanttary qamtylǵan. Shamamen 2 mlrd teńge somasyna 1 mln adamdy qamtý josparlanýda.
KVI-diń yqtımal jańa tolqynyna daıyndyq maqsatynda Biryńǵaı dıstrıbıýtor COVID-19 boıynsha dárilik zattardyń eki aılyq qoryn (tómendetilmeıtin qor) qalyptastyrdy.
«Statsıonarlarda aıyna 60 000 patsıentti COVID-19 koronovırýstyq ınfektsııasynan emdeý úshin dári-dármekterdiń 44 ataýy satyp alynýda. Preparattardyń bul toptary bir-birin almastyrady jáne derttiń aýyrlyǵyna baılanysty emdeýshi dáriger taǵaıyndaıdy. Qazirgi ýaqytta COVID-19-ǵa arnalǵan dárilik zattardyń 44 ataýynan 39 dári-dármek satyp alyndy. Gýmanıtarlyq kómek aıasynda qajetti dári-dármekterdi jetkizý máselesi qosymsha pysyqtalýda», - dedi Erhat Esqalıev.
Tómendetilmeıtin qor kólemi bekitilgen kestege sáıkes Biryńǵaı dıstrıbıýtordyń 4 habyna jetkiziledi.
Munymen qosa, «SQ-Farmatsııa» basshysy óńirlerde dári-dármek qoryna qatysty monıtorıng júrgizilgenin aıtty. Bıylǵy qazan aıynyń ekinshi onkúndiginen bastap Sybaılas jemqorlyqqa qarsy qyzmet Nur-Sultan, Almaty, Shymkent qalalarynda, sondaı-aq barlyq 14 oblys ortalyqtarynda jurtshylyqtyń, BAQ-tyń qatysýymen dárilik zattardyń, onyń ishinde 2 aılyq tómendetilmeıtin qordyń bolýyna monıtorıng júrgizdi. Medıtsına qyzmetkerlerine arnalǵan jeke qorǵaný quraldaryn jergilikti atqarýshy organdar Úkimet rezerviniń qarajatynan derbes satyp aldy jáne 3 aılyq qor quryldy. Jergilikti atqarýshy organdar turaqtandyrý qorlary qarajatynan qosymsha jeke qorǵaný quraldaryn satyp aldy.
Onyń aıtýynsha, Úkimet halyqty tegin ambýlatorııalyq jáne statsıonarlyq kómek deńgeıinde de, bólshek saýda deńgeıinde de suranysqa ıe preparattarmen qamtamasyz etý boıynsha barlyq múmkin sharalardy qabyldaýda. Úkimettiń qaýlysymen (23.07.2020 j. №468) «SQ-Farmatsııa» JShS-ine dárilik zattardy keıinnen bólshek saýda jelisinde satý úshin kóterme saýdada satyp alý boıynsha ókilettikter berilgen.
«Ákimdikter KVI-diń yqtımal jańa tolqynyna daıyndyq turǵysynda jáne bólshek saýda dárihanalarda preparattardyń tapshylyǵyn boldyrmaý úshin Biryńǵaı dıstrıbıýtor portalynda dárilik preparattardyń tapshy 33 ataýy boıynsha 3,1 mlrd teńge somasyna (2 aılyq qajettilikke) ótinim berdi. Kólem ákimdikterdiń ótinimine sáıkes 17 óńirdegi Biryńǵaı dıstrıbıýtordyń operatsııalyq qoımalarynda qalyptastyrylady», - dedi E. Esqalıev.
Onyń sózine qaraǵanda, óńirler ákim orynbasarlarynyń qol qoıýymen shalǵaı aýdandarda fılıaldyq jelisi bar 1 163 bólshek saýda dárihanalarynyń jelisin usyndy, olar arqyly ınterventsııa júzege asyrylatyn bolady. Osylaısha, dárihanalardyń bólshek saýda jelisinde taýarlar tapshy bolǵan jaǵdaıda óńirlerdiń jóneltýge ruqsat qaǵazy negizinde tıep-jóneltý bastalatyn bolady.