Koronavırýspen kúres: AÁK alatyn otbasylarǵa dári qobdıshasy tegin taratylady

NUR-SULTAN. QazAqparat – Qazaqstanda koronavırýstyq ınfektsııanyń taralý deńgeıin tómendetý maqsatynda bıylǵy maýsym aıyna deıin 145 myń medıtsınalyq dári qobdıshasy tabysy az, ataýly áleýmettik kómek alýshy otbasylarǵa tegin jetkiziletin bolady, dep habarlaıdy QazAqparat.

«Medıtsınalyq dári qobdıshalaryn satyp alýǵa qarajat Azııa damý bankiniń granty esebinen bólinetin bolady. Dári qobdıshalaryn BUUDB arqyly satyp alý boljanyp otyr. Jıyntyqtardyń quramyn QR Densaýlyq saqtaý mınıstrligi aıqyndady jáne oǵan termometrler, maskalar, dezınfektsııalyq quraldar jáne steroıdty emes qabynýǵa qarsy preparattar kiredi. Dári qobdıshalaryn alýshylarǵa jetkizýdi qalalyq nemese aýdandyq jumyspen qamtýdy úılestirý jáne áleýmettik baǵdarlamalar bólimderi ári aýyldyq ákimdikter júzege asyrady. Bul shara materıaldyq jaǵdaıy qıyn, ataýly áleýmettik kómek alýshy otbasylardyń ekonomıkalyq júktemesin azaıtýǵa múmkindik beredi», - delingen Eńbek mınıstrligi málimetinde.

Osylaısha, bıyldyń maýsym aıyna deıin Qazaqstandaǵy tabysy az otbasylarǵa 145 myń medıtsınalyq dári qobdıshasy jetkiziletin bolady.

Esterińizge sala keteıik, 2020 jyldyń 10 shildesinde QR Úkimetiniń keńeıtilgen otyrysynda Memleket basshysy tabysy az otbasylardy koronavırýstyq ınfektsııanyń taralýyna jol bermeý maqsatynda dári-dármektermen jáne alǵashqy medıtsınalyq qorǵaý quraldarymen qamtamasyz etýdi tapsyrǵan bolatyn.