Koronavırýspen aýyrǵandar úshin 5 myńǵa jýyq oryn bar

NUR-SULTAN. QazAqparat – 189 medıtsınalyq uıymda 5 myńǵa jýyq koronavırýspen aýyrǵandar úshin oryn jasaqtaldy. Bul týraly Úkimet otyrysynda Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Densaýlyq saqtaý salasyna túsken júktemege keletin bolsaq, qazirgi kezde ınfektsııalyq orynmen qamtý 30 paıyzdy (1500 naýqas), reanımatsııalyq orynmen qamtý 7 paıyzdy (45 naýqas) qurady», - dedi A. Ǵınııat.

Onyń aıtýynsha, mınıstrlik koronavırýs ınfektsııasynyń taralýyna jol bermeý jáne turaqty negizde ýaqtyly epıdemııaǵa qarsy sharalar qabyldaý maqsatynda óńirlermen ahýaldy baǵalaý boıynsha shtabtar júrgizilip jatyr. Munymen qosa, jaǵdaıdy turaqtandyrýǵa baǵyttalǵan sharalar qabyldanyp otyr.

«KVI-ǵa medıtsınalyq uıymdardyń daıyndyǵy turaqty negizde qamtamasyz etilip jatyr. Qazirgi kezde 189 medıtsınalyq uıymda 5 myńǵa jýyq kovıdtik oryn, 620 reanımatsııalyq oryn, rezervte 20 myńnan astam oryn bar. Emhanalar deńgeıinde 5 700 uıym jáne 2 400-ge jýyq kóshpeli mobıldi top jasaqtalǵan. Onyń 1000-nan astamy aýylda medıtsınalyq kómek kórsetip jatyr. Rezervte 1 610 mobıldi brıgada bar», - dedi mınıstr.

Budan buryn habarlanǵandaı, mınıstr qyrkúıek aıynda koronavırýstyń taralýy tómendeýi múmkin ekenin aıtty.