Koronavırýspen aýrýhanada jatqan naýqastar sany azaıyp keledi

NUR-SULTAN. QazAqparat – Koronavırýspen aýrýhanada jatqan naýqastar sany azaıyp keledi. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Kúndelikti monıtorıngke sáıkes, óńirler sheginde tósek-oryn júktemesi osy jyldyń 25 mamyryndaǵy jaǵdaıǵa sáıkes, respýblıka boıynsha ınfektsııalyq tósek-oryndardyń júktemesi 33 paıyzdy quraıdy jáne mamyr aıynyń alǵashqy kúnderimen salystyrǵanda, 8 paıyzǵa, reanımatsııalyq tósek-oryndar júktemesi 2 paıyzǵa tómendedi», - dedi mınıstr.

Onyń atap ótýinshe, buǵan deıin tósek-oryn júktemesi joǵary bolǵan óńirlerde de mundaı kórsetkish tómendep kele jatyr.

«Nur-Sultan qalasynda tósek-oryn júktemesiniń oń dınamıkasy baıqalyp, mamyr aıynda tósek-oryn júktemesiniń jalpy úlesi 60-tan 47 paıyzǵa deıin, Almaty qalasynda 57-den 35 paıyzǵa deıin, Almaty oblysynda 56-dan 36 paıyzǵa deıin tómendedi», - dedi Alekseı Tsoı.