Koronavırýsqa qatysty álemdegi ahýal
Shveıtsarııa karantın talaptaryn jeńildetti. Elde meıramhanalardyń ishki jaılary ashylyp, aýdıtorııalardaǵy stýdentter sany boıynsha shekteýler alynyp tastaldy. Sondaı-aq, shekteýler engizilgen salalar úshin qashyqtan jumys rejımi joıyldy. Alaıda Bern bıligi jumys berýshilerge qyzmetkerlerdiń úıden jumys isteýine múmkindik berýdi usynady. COVID-19-ǵa qarsy vaktsınany alǵan el turǵyndary epıdemıologııalyq qaýip deńgeıi joǵary elderden oralǵannan keıin oqshaýlanýǵa mindetti bolmaıdy.
Qytaıdyń ońtústiginde koronavırýs ınfektsııasyn el ishinde juqtyrý jaǵdaılary artty. Gýandýn provıntsııasynda ótken táýlikte ınfektsııaǵa 20 adam shaldyqqan. Oqıǵalardyń 18-i Gýanchjoý ákimshilik ortalyǵynda anyqtalǵan. Sonymen qatar, provıntsııada koronavırýs ınfektsııasynyń asımptomatıkalyq aǵymynyń úsh jaǵdaıy tirkeldi.
Germanııada KVI taralý deńgeıi tómendep keledi. Infektsııany juqtyrǵandar kórsetkishiniń kúndelikti ósimi 1 978 jaǵdaıdy qurady. Bul bir apta burynǵy kórsetkishke qaraǵanda 704 jaǵdaıǵa kem. Pandemııa bastalǵannan beri halqynyń sany 84 mıllıondy quraıtyn Germanııada koronavırýstyń 3 681 126 oqıǵasy anyqtaldy. Іndetten 88 442 adam kóz jumdy. Sońǵy 7 kúnde 100 000 turǵynǵa shaqqanda ınfektsııany juqtyrýdyń 35,1 jaǵdaıy tirkeldi.
Sondaı-aq Germanııada pandemııa bastalǵannan beri koronavırýsty juqtyrýdyń birde-bir jaǵdaıy tirkelmegen aýyl anyqtaldy. Ol eldiń batysyndaǵy Reınland-Pfalts jerinde ornalasqan 400 turǵyny bar Lıg aýyly. Onda 14 aı boıy koronavırýs indeti tirkelmegen.
Bakýde metro qaıta jumys isteı bastady. Ázerbaıjan bıligi búginnen bastap astanadaǵy metropolıtenniń jumysyn qaıta jandandyrdy. Baký metrosy jolaýshylardy 2020 jyldyń qazanynan beri qabyldaǵan joq. Karantındik sharalardyń álsireýine qaramastan, metro basqa da qoǵamdyq kólikter sııaqty demalys kúnderi jumys istemeıdi. Al, 10 maýsymnan bastap elde meshitter men hramdar kelýshiler úshin esigin ashady.
Resmı Kaır karantın talaptaryn jeńildetedi. Mysyr bıligi dámhanalar, meıramhanalar, dúkender men saýda ortalyqtarynyń jumysyna qoıylǵan shekteýlerdi alyp tastaý týraly sheshim qabyldady. Erteńnen bastap tamaqtaný oryndary men dúkender jazǵy jumys rejımine oralyp, túngi saǵat 00:00 deıin jumys isteı alady. Mysyrlyq úkimet shekteýlerdi jeńildetýmen qatar, Hýrgada men Sharm-esh Sheıh sııaqty týrıster arasynda eń tanymal eki kýrorttyń barlyq turǵyndaryn vaktsınalaýǵa nıetti ekendigin habarlady.
Ońtústik Koreıada halyqtyń 10,5% Sovid-19-ǵa qarsy egildi. Ótken táýlikte ǵana elde 163 457 adam vaktsınalandy. 30 mamyr saǵat 00:00-degi jaǵdaıǵa sáıkes, elde 5 399 015 adam ekpeniń alǵashqy dozasyn alǵan. Egilý deńgeıi 10,5% qurady.
Japonııa bıligi koronavırýs ınfektsııasyna tapsyrylǵan PTR-test anyqtamasy bolǵan jaǵdaıda jankúıerlerdi Tokıoda ótetin Olımpıada men Paralımpıada oıyndaryna kirgizýge nıetti. Ekpe saldyrǵan azamattar da tıisti qujatty usynýy shart.
PTR-zertteý stadıonǵa kelgenge deıin jeti kún buryn jasalýy kerek.
Stadıonǵa kirer aldynda mamandar kórermenderdiń temperatýrasyn tekserip, betperdeniń bolýyn qadaǵalaıdy.
Al Olımpıadadaǵy jankúıerlerdiń sanyn shekteýge qatysty másele maýsym aıynda sheshiletin bolady.