Koronavırýsqa qarsy vaktsına salý tártibi aıqyndalady - Bolat Tókejanov

NUR-SULTAN. QazAqparat – 21 ınfektsııaǵa qarsy ekpe respýblıkalyq ári jergilikti bıýdjet esebinen jasalady. Bul týraly Áleýmettik medıtsınalyq saqtandyrý qory basqarma tóraǵasy Bolat Tókejanov málim etti, dep habarlaıdy QazAqparat tilshisi.

21 ınfektsııaǵa qarsy halyqtyń tıisti toptaryna belgili bir jas aralyǵy kezeńinde josparly ekpe salanatynyna toqtalǵan ol, «Respýblıkalyq bıýdjetten ekpeniń 17 túri, al jergilikti bıýdjetten 4 ekpe qarjylandyrylady. Olardyń barlyǵy ulttyq ekpeniń kúntizbesine enip otyr», - dedi ol.

Onyń sózine qaraǵanda, tumaýǵa qarsy vaktsınalaý bıýdjet esebinen azamattardyń jeke sanattary arasynda júrgiziledi. Bul turǵyda medıtsına qyzmetkerleri, dıspanserlik esepte turǵan balalar, sondaı-aq balalar úılerindegi jetkinshekter qamtylady. Kúntizbege enbegen profılaktıkalyq ekpeler erikti bolyp sanalady jáne aqyly negizde júrgiziledi.

«Koronavırýsqa qarsy halyqty vaktsınalaý baǵytyna toqtalsaq, Qazaqstan naryǵynda koronavırýs ınfektsııasyna qarsy qaýipsiz ári tıimdi ekpe paıda bolǵannan keıin, vaktsınalaý birinshi kezekte táýekel tobyndaǵy adamdarǵa tegin bolady. Atap aıtqanda, sozylmaly aýrýy bar 65 jastan adamdar, medıtsına qyzmetkerleri eskeriledi. Meniń oıymsha, vaktsınalaý tártibin Úkimet aıqyndaıtyn bolady», - dedi Bolat Tókejanov.