Koronavırýs juqtyrǵanyn adam tiliniń túsinen bilýge bolady - pýlmonolog Abzal Malbasqanov

ALMATY. QazAqparat – Almaty Ftızıopýlmonologııa ortalyǵynyń juqpaly aýrýlar bóliminiń meńgerýshisi, ftızıohırýrg, pýlmonolog Abzal Malbasqanov onlaın suhbat kezinde adamnyń ıis, dám sezý múmkindiginiń tómendeýine qatysty tájirıbesimen bólisti, dep habarlaıdy QazAqparat tilshisi.

Dárigerdiń aıtýynsha, ókpeniń densaýlyǵyna keri yqpal etetin faktorlardyń ishinde temeki men qorqor da bar.

«Qorqor shegý adam aǵzasyna zııan. Ony adamdar qoǵamdyq oryndarda shegedi. Onyń ishinde týberkýlez dertine shaldyqqan kisilerden keıin shekken adamdar aýrý juqtyrady. Qorqordy arnaıy eritindimen birneshe saǵatqa zararsyzdandyrý kerek», - dedi dáriger.

Qorqor ókpe qabynýyna ákelýi múmkin.

«Qorqor ókpege óte zııandy. Bul turǵydan ǵylymı zertteýler jasalǵan. Temeki shegý ókpeniń irińdeýine soqtyrady», - dedi ol.

Ftızıohırýrg ıis jáne dám sezý qabileti joǵalǵan adamdarǵa qatysty jaýap berdi.

«Dezınfektsııalyq quraldardy shashqanda allergııalyq reaktsııa bolýy yqtımal. Qysqa ýaqytqa ıis sezý qabileti tómendeýi múmkin. Biraq, allergııanyń sebebinen dám sezý qabiletin joǵaltý sırek kezdesedi. Muryn qurǵaq bolsa da, adam ıis sezý qabiletinen aırylsa, ol koronavırýs sımptomy bolýy yqtımal», - dedi Abzal Malbasqanov.

Ókpeniń zaqymdanýy problemasymen jıi aınalysatyn maman óziniń dárigerlik baqylaýymen bólisti.

Onyń aıtýynsha, koronavırýs juqtyrǵan adamda kúmán bolsa, tiliniń túsinen anyqtaýǵa bolady.

«Adamda kúmán bolsa, aınaǵa qarap, tilin kórýi kerek. Tiliniń túsi qaraıyp tursa, koronavırýs bolýy múmkin. Bul aǵzanyń jaǵdaıyn kórsetedi», - dedi dáriger.