Koronavırýs jeńil ótip jatqanymen, der kezinde emdelmese, asqynyp ketedi – Ajar Ǵınııat

NUR-SULTAN. QazAqparat – Koronavırýs juqtyrǵan qazaqstandyqtardyń 94%-dan astamy ambýlatorııalyq jaǵdaıda emdelip jatyr, dep habarlaıdy QazAqparat tilshisi.

Bul týraly QR Densaýlyq saqtaý mınıstri Ajar Ǵınııat Ortalyq kommýnıkatsııalar qyzmetinde ótken brıfıngide aıtty.

«KVI-men syrqattanýdyń qazirgi sıpaty bylaı: naýqastarda aýrý jeńil túrde ótýde. Alaıda der kezinde emdelmese, aýrý asqynady. Bul naýqastardyń 94%-dan astamy ambýlatorııalyq jaǵdaıda emdeletindigimen de rastalyp otyr.

Qazirgi tańda respýblıkada 5 062 tósek-orny bar 191 ınfektsııalyq aýrýhana KVI boıynsha statsıonarlyq kómek kórsetedi, tósek-orynmen qamtý 28%-dy quraıdy. Reanımatsııalyq tósek-oryn 7%-dy quraıdy», - dedi vedomstvo basshysy.

Sondaı-aq, ol ınfektsııalyq tósek-oryn qoldaný kórsetkishi ásirese Nur-Sultan qalasy (55%) men Soltústik Qazaqstan oblysynda (59%) baıqalyp otyrǵanyn atady.

«Reanımatsııalyq orynmen qamtýdyń eń joǵary kórsetkishi Nur-Sultan qalasynda – 28% jáne Túrkistan oblysynda – 20%.

Búgingi jaǵdaı boıynsha elimizdiń qatań bólimshelerinde KVI dıagnozymen 43 patsıent em alyp jatyr.

Saraptama, tekserister kezinde qaraǵanda, patsıentterdiń 20,3%-ynan artyǵy arterııalyq gıppertenzııa aýrýymen, 7%-da ókpeniń sozylmaly obstrýktıvti aýrýy, 5%-da júrektiń ıshemııalyq aýrýy, 8%-dan astamy qant dıabeti sııaqty sozylmaly aýrýlarmen aýyratyn patsıentter boldy», - dedi mınıstr.

Dúnıejúzilik densaýlyq saqtaý uıymynyń málimetinshe ótken aptada 6,5 mln-nan astam adam koronavırýs juqtyryp, dertten 14 myń adam kóz jumǵan.