Koronavırýs úreıli bolǵanymen jaýapkershilik qashan da joǵary – qazaq-qytaı shekarasyndaǵy tekserýshi maman

NUR-SULTAN. QazAqparat - Koronavırýs qaýpi jaıly eń alǵash aqparattar shyǵa bastaǵanda dúıim jurt dúrligip, kóptiń nazary shekaradaǵy beketterge aýǵan edi. Qazaqstan men Qytaı arasyndaǵy sondaı stantsııalardyń biri – Almaty oblysynyń Panfılov aýdanyndaǵy Altynkól beketi. Alaıda alǵashqy kúnnen bastap Altynkól stantsııasynyń sanıtarlyq-karantındik qyzmeti shekaradaǵy birde-bir adamdy tekserissiz ótkizbeı, jaǵdaıdy qatań baqylaýda ustap keledi.

Altynkól stantsııasyndaǵy sanıtarlyq-karantındik qyzmet Densaýlyq saqtaý mınıstrliginiń Taýarlar men kórsetiletin qyzmetterdiń sapasy men qaýipsizdigin baqylaý komıtetiniń aýmaqtyq departamentine qaraıdy. Mundaǵy sanıtarlyq-karantındik baqylaý bólimniń basshysy Ǵalıolla Nýrýllın birneshe mamanmen birge kúndiz-túni demalyssyz tekseris jumystaryn júrgizip keledi eken.

«Qazirgi ýaqytta Qazaqstan men Qytaı arasyndaǵy tek lokomotıv brıgadasynyń músheleri júk tasymalyn oryndap júr. Júk tasymaldanǵan kezde lokomotıvtiń eki qyzmetkeri ǵana júredi. Buryn osy qyzmetkerlermen oqý-jattyǵý jıynyn ótkizgenbiz. Qazir birde-bir jolaýshy ary nemese beri óte almaıdy. Tek júk tasymaly bar. Lokomotıv brıgadasynyń múshelerin biz birden neıtraldy aýmaqqa aparyp, termometrııadan, saýalnamadan ótkizemiz. Keıde kúnine 8 adam, keıde 30 adamǵa deıin tekseriledi», - deıdi Ǵalıolla Nýrýllın QazAqparat tilshisimen telefon arqyly bergen suhbatynda.

Altynkól stantsııasynda jumys kúndiz-túni toqtamaıdy.

Táýliktik sanıtarlyq-epıdemıologııalyq tekseris kúsheıtilgen. Barlyq brıgada jumys rejimin qataıtyp, tipti qosymsha kómek retinde issaparmen kelip, jumys istep jatqandar bar.

«Bizdiń arqamyzǵa úlken jaýapkershilik artylǵanyn túsinip otyrmyz. Belgili bir qıyndyqtarǵa qaramastan qolymyzdan kelgen jumystyń bárin atqaryp kelemiz. Bas sanıtarlyq dárigerdiń qaýlysyna sáıkes bizge júktelip otyrǵan mindetterdiń bári oryndalýda. Álbette bizdiń jumystyń barysyn keıde túsinbeıtin adamdar da kezdesedi. Alaıda jan-jaqty aqparattandyryp, koronavırýstyń qaýpin durystap túsindirgennen keıin til tabysqandaı bolamyz», - deıdi Ǵalıolla Nýrýllın.

Bekettiń mamandary bas memlekettik sanıtarlyq dárigerdiń qaýlysy shyǵyp, oǵan ózgeris engizilgen saıyn jumys rejimi kúsheıtip, talapty da arttyra bastaıdy eken.

«Qaýlyǵa sáıkes jumysty oryndaý qıyn bolsa da eńserip kelemiz. Alǵashqy kúnderi stantsııada táýlik boıy júrgen kezder boldy. Qazirge deıin tyǵyz bolsa da uıymdasqan jumys rettelip qaldy. Osydan baryp azdap demalatyn da ýaqyt tabyldy. Eń bastysy el aman bolsyn dep qana tilep otyrmyz. Aqparattardan elimizde koronavırýs juqtyrǵandardyń sany kúnnen-kúnge artyp kele jatqanyn oılap týǵandaryń úshin, halyq úshin alańdaısyń. Áıtse de bunyń bir qaıyry bolar. Kópshilik qoǵam aldynda óziniń jaýapkershiligin túsinse eken. Sonda ǵana bul qıyndyqty da eńseretimizge senemin», - dep túıdi Ǵalıolla Nýrýllın.