Koronavırýs: Túrkistan oblysynda dári-dármek qory jasaqtaldy

TÚRKІSTAN. QazAqparat – Túrkistan oblysynda barlyq medıtsınalyq mekemeler pandemııanyń yqtımal ekinshi tolqynyna daıyndyq aıasynda eki aılyq dári-dármek qorymen qamtyldy. Bul týraly oblystyq Qoǵamdyq densaýlyq basqarmasy basshysynyń orynbasary Nurhan Narymbetova málim etti, dep habarlaıdy QazAqparat tilshisi.

Nurhan Narymbetovanyń aıtýynsha, óńirdegi medıtsınalyq uıymdardy dárilik zattar jáne arnaıy qorǵanysh quraldarymen qamtamasyz etý maqsatynda jalpy 2,1 mlrd teńge bólingen.

«Oblysta 600 ınfektsııalyq jáne 340 karantındik tósek-oryn uıymdastyryldy. Koronavırýs ınfektsııasynyń ártúrli stsenarııine baılanysty ınfektsııalyq tósek-oryndar sanyn 5 610-ǵa deıin ulǵaıtýǵa múmkindik bar. Respýblıkalyq, oblystyq bıýdjetten bólingen qarjyǵa dárilik zattar, medıtsınalyq buıymdar, dezınfektsııalyq ertindiler satyp alyndy. Onyń 70% medıtsınalyq mekemelerde, qalǵan 30% oblystyq Qoǵamdyq densaýlyq basqarmasynyń qoımasynda qor retinde saqtalýda», -dedi Nurhan Nurymbetova.

Al, oblystyń Bas memlekettik sanıtarııalyq dárigeriniń orynbasary Aldarqul Ahmetov óńir turǵyndaryna aldaǵy merekelik demalys kúnderde saqtyq sharalaryn ustanýǵa shaqyrdy. Ol Túrkistan oblysy epıdemıologııalyq ahýal boıynsha «jasyl aımaqqa» engizilgenimen, bosańsýǵa bolmaıtyndyǵyn eskertti. Aıta keteıik, qazirgi tańda oblystaǵy medıtsınalyq mekemelerdegi ókpeni jasandy jeldetý apparattarynyń sany 178-den 345-ge deıin artty. Qosymsha 4 ottegi stantsııasy ornatylyp, stantsııa sany 8-ge jetti. Sondaı-aq, 80 birlik oksıgenatsııa apparaty (HI-FLOW) satyp alynǵan. Ottegi kontsentratorlarynyń sany 890 birlikke jetip, ottegi núkteleriniń sany 205-ten 2905-ke deıin ulǵaıtyldy.