Koronavırýs: Túrkistan oblysynda bir táýlikte 1500 adam PTR test tapsyrdy
Oblys ákimi Ómirzaq Shókeevtiń tóraǵalyǵymen ótken májiliste oblys aýmaǵyndaǵy koronavırýs ınfektsııasy men sanıtarııalyq-epıdemıologııalyq jaǵdaı týraly sońǵy málimetter aıtyldy.
Oblystyq qoǵamdyq densaýlyq basqarmasynyń basshysy Marat Pashımovtyń baıandaýynsha, óńirdiń memlekettik zerthanalarynda ótken táýlikte 1,5 myńǵa jýyq adam tekserildi.
Zertteýler dınamıkasy boıynsha aldyńǵy aptamen salystyrǵanda PTR zertteý sany 1,1 %-ǵa kóbeıgen.
Oblys aýmaǵynda medıtsına qyzmetkerleri vaktsınanyń ekinshi komponentin saldyrdy.
Barlyq aýdan, qalalarda mobıldi toptar jumys isteýde.
Karantın rejımin buzǵandar boıynsha shuǵyl aqparat 1 saǵat ishinde Úılestirý ortalyqtaryna joldaýy tıis.
Oblys ákimi Ómirzaq Shókeev barlyq aýdan, qala ákimderine mobıldi toptardyń jumysyn kúsheıtip, karantın talaptarynyń saqtalýyn shuǵyl túrde tekserýdi tapsyrdy.
Májilis barysynda Túrkistan qalasyn bezendirý, ásemdeý, kórkeıtý jumystarynyń barysy týraly shahar basshysy Rashıd Aıýpov baıandady.
Áýejaı aýmaǵynan «Batys Qytaı - Batys Eýropa» avtojoly boıyna, ıaǵnı qalanyń B. Sattarhanov dańǵylyna deıin jalpy LED ekrandar, jalaýshalar men 32 bılbordtar, 300-den astam jaryqtyq kronshteınder jáne 17 aıaldama ornatylady.
Túrkistan qalasyna kireberis aýmaǵy men qalada baǵyt-baǵdar siltemeleri paıda bolady.
Oblystyq aýylsharýashylyǵy basqarmasynyń basshysy Nurbek Badyraqov kóktemgi dala jumystaryna daıyndyq sharalary jáne veterınarııalyq is-sharalardyń barysy týraly baıandady.
Egistikti ártaraptandyrý boıynsha ótken jylmen salystyrǵanda masaqty daqyldar men egis kólemi 5 myń gektarǵa jáne maqta daqylynyń egis kólemi 10 myń gektarǵa qysqartylyp otyr.
Onyń ornyna maıly daqyldardyń egis kólemi 10 gektarǵa, baqsha daqyldary 7 myń gektarǵa jáne mal azyǵy daqyldary 3 myń gektarǵa qosymsha egistik kólemi ulǵaıǵan.
Búgingi tańda josparlanǵan 500 myńǵa ga jýyq jer aıdalyp, jumystyń 98 paıyzy oryndaldy.