Koronavırýs: Táýliktik ósim azaıyp, dárigerler ótemaqy alýda
Qazaqstanda qatań shekteý sharalary engizilgennen bastap, koronavırýspen syrtqattanýshylyqtyń táýliktik ósimi 0,5 paıyzǵa deıin tómendedi. Bul týraly QR Bas memlekettik sanıtar dárigeri Aıjan Esmaǵambetova Ortalyq kommýnıkatsııalar ortalyǵynda ótken onlaın brıfıng barysynda aıtty.
«Qazirgi kezde koronavırýs ınfektsııasy boıynsha epıdemıologııalyq jaǵdaıdyń turaqtaný úrdisi baıqalýda. Bıylǵy 14 tamyzdaǵy málimet boıynsha, Qazaqstanda PTR oń nátıje kórsetken koronavırýs ınfektsııasynyń 101 848 jaǵdaıy tirkeldi», - deıdi
QR Bas memlekettik sanıtar dárigeri Aıjan Esmaǵambetova.
Sondaı-aq, ol bir táýlikte 476 adam koronavırýs indetimen aýyrǵany belgili bolǵanyn aıtty.
«Qatań shekteý sharalary engizilgennen bastap syrtqattanýshylyqtyń táýliktik ósimi 0,5 paıyzǵa deıin tómendedi. Tirkelgen Covid-19 jaǵdaılarynyń jalpy sanynyń 77 paıyzdan astamy emdelip, kúndelikti ómirge oraldy», - deıdi ol.
Qazirgi ýaqytta QR Densaýlyq saqtaý mınıstrligi de qaýipsiz jáne tıimdi vaktsınany kútýde.
«Búgingi tańda álemde koronavırýs ınfektsııasyna qarsy 166 vaktsına jobasy jasaldy. Olardyń kópshiligi klınıkaǵa deıingi testileý kezeńinde. Testileý erejesi bar - bul úsh kezeńnen ótý jáne mindetti túrde tirkeý. Koronavırýs ınfektsııasyna qarsy 120 vaktsınanyń 17-si adamdarǵa synalyp jatyr. Eger biz Reseı vaktsınasy týraly aıtatyn bolsaq, onda ol klınıkalyq synaqtyń 2 kezeńinen ótken, Reseı Federatsııasynda tirkelgen», - deıdi bas sanıtarlyq dáriger.
Ol vaktsına egýde qandaı toptarǵa basymdyq beriletinin aıtty.
«Búgingi kúni biz vaktsınatsııalaýǵa jatatyn toptarmen jumys istep jatyrmyz. Bizde qaýipti toptar boıynsha josparlar bar, olar úshin koronavırýs aýrýy óte qaýipti. Olar - 60-65 jastan asqan belgili bir sozylmaly aýrýlary bar adamdar», - deıdi ol.
Bul topqa medıtsına qyzmetkerleri de jatady.
«Óıtkeni olar eń aldymen patsıenttermen jáne koronavırýs juqpasynyń belgileri joq, biraq tasymaldaýshy bolyp sanalatyn adamdardy qarap, baılanysta bolady. Sondyqtan biz vaktsınatsııaǵa daıyndyq, vaktsınany tańdaý jáne Densaýlyq saqtaý mınıstrliginde vaktsınatsııa strategııamyzdy ázirleý boıynsha jumys júrgizýdemiz», - deıdi Aıjan Esmaǵambetova.
Sonymen qatar, ol jumys ornynda COVID-19 juqtyrǵan medıtsına qyzmetkerlerine tólem jasaý jaıynda aıtyp berdi.
«Densaýlyq saqtaý mınıstri men Eńbek jáne halyqty áleýmettik qorǵaý mınıstriniń birlesken buıryǵy bar. Onda ótemaqy tóleý men osy qujattardy qaraýdyń tártibi eskerilgen. Óńirlik komıssııalar bar ekenin atap ótken jón. Osy komıssııalar árbir medıtsına qyzmetkeriniń qujattar paketin qarastyrady», - deıi ol.
Osy oraıda ol tólem boıynsha sheshim shyǵarylsa, atalǵan qujattar toptamasy Eńbek mınıstrliginiń júıesine engiziletinin aıtty.
«Densaýlyq saqtaý mınıstrligi qarastyrylǵan ári maquldanǵan tólemderge kún saıyn monıtorıng júrgizedi. Bizdiń málimetke qarasaq, keshegi kúnge deıin 500 medıtsına qyzmetkerine tólem jasaldy. Atalǵan komıssııalardyń jumysy turaqty jumys isteýde», - deıdi A. Esmaǵambetva.
Bul indettiń kesiri kásipkerlerge de tıip ótkeni ras. 830 myńǵa jýyq bıznes osy kúnge deıin jumysistemeı turǵan.
«Bul shamamen 1,3 mln adamǵa qatysty. Qabyldanǵan sharalarǵa baılanysty 17 tamyzdan bastap kóp bıznes túri jumys isteýge múmkindik alady. Kásipkerler jumysqa shyqqannan keıin qandaı jumys algorıtmi talap etiledi, osy týraly úsh aptaǵa jýyq bıznestiń daıarlyq assotsıatsııalarymen talqyladyq. 3-4 kúnde sheshim qabyldandy. Eń bastysy - «Atameken» UKP qoldaýymen infokazakhstan.kz saıty iske qosyldy. Jumysqa shyǵatyn kásipkerler osy saıtqa tirkelip, ruqsatnamasyn alyp, jumys isteýge múmkindigi bar», - deıdi «Atameken» Ulttyq kásipkerler palatasy basqarma tóraǵasynyń birinshi orynbasary Eldar Jumaǵazıev.
Al 17 tamyzdan keıin de kásibin júrgizýge tyıym salynǵan kásipkerlerge ótemaqy tólene me?
«Jumystaryn bastaýǵa ruqsat berilmegen qyzmet túrleri de bar. Olarǵa qatysty usynystarymyzdy daıyndap jatyrmyz. Mysaly, saparjaıda 74 adam jumyssyz otyrýǵa májbúr. Bul, bıýdjet múmkindigine qatysty suraq deýge bolady. Pandemııa kezinde biz ótemaqy tóleý týraly bastama kóterdik. Birinshi aıda ótemaqy tólendi, odan keıin karantın ýaqyty taǵy sozyldy. Endi, osy máselege qatysty QR Ekonomıka mınıstrligimen birigip usynys ázirleımiz. Saýda ortalyqtary men úlken bazarlarǵa qatysty táýekel kóp. Ol jerde saqtyq sharalary qalaı saqtalady, ony qalaı retteý kerek - bul jaǵy úlken suraq. Jumysy toqtap turǵan kásipkerlerge ótemaqy berilýin qoldaımyz. Qazirgi ýaqytta salyq tóleýdi, nesıe tóleýdi shegerýge qatysty suraqtardy qarastyryp jatyrmyz», - d eıdi ol.
Onlaın brıfıng barysynda QR Bas memlekettik sanıtarlyq dárigeri Aıjan Esmaǵambetova shetelmen áýe baılanysyn jandandyrý komıssııada mindetti túrde qaralatynyn jetkizdi.
Shetel azamattarynyń kelýine ruqsat berýdiń tıisti ólshemderi daıyndalǵan. Osy oraıda úsh ólshem eskerilgen.
«Birinshiden, epıdemıologııalyq jaǵdaı (jolaýshy keletin memlekette) bizge qaraǵanda jaqsy bolsa. Qazaqstanda Qoǵamdyq densaýlyq saqtaý ulttyq ortalyǵy bar. Olar kún saıyn elimizdegi jaǵdaıdy, sondaı-aq tikeleı halyqaralyq baılanys bar basqa da memleketterdegi epıdemıologııalyq jaǵdaıǵa monıtorıng júrgizedi. Eger de osy elderde koronavırýsqa shaldyǵý boıynsha epıdemıologııalyq jaǵdaı birqatar kórsetkishtermen sıpattalsa, onda bul memleketterden ushyp kelgen jolaýshylar elimizge qandaı da bir shekteýsiz kiredi. Ekinshiden, epıdemıologııalyq jaǵdaı bizdiń elimiz deńgeıinde, ıaǵnı aýrýǵa shaldyǵý nemese basqa kórsetkishter boıynsha Qazaqstandaǵy jaǵdaımen birdeı bolsa, onda elge keletin adam teris analız jóninde PTR-anyqtamany usynýy kerek. Anyqtama merzimi 5 kúnnen aspaýy tıis. Eger osy anyqtama bolmasa, bul jolaýshynyń málimetteri mobıldi qosymshaǵa engiziledi. Sonymen qatar jolaýshy eki táýlik ishinde el ishinde PTR-testiden ótetindigi týraly qolhatqa qol qoıady nemese 14 kún boıy úı karantıninde otyrady. Úshinshi topqa bizdiń elge qaraǵanda epıdemıologııalyq jaǵdaıy nashar memleketter enip otyr. Onda osy eldermen áýe baılanysyna tyıym salynady», - deıdi Aıjan Esmaǵambetov.