Koronavırýs: Slovakııada jappaı testileý ótedi, Majarstanda rekordtyq ólim kórsetkishi tirkeldi
Slovenııada el azamattaryna on kún boıy óz aýdandary men qalalarynan shyǵýǵa tyıym salyndy. COVID-19-ǵa qatysty ahýal shıelenisken jaǵdaıda ol uzartylýy múmkin. Sondaı-aq, el bıligi barlyq shuǵyl emes medıtsınalyq kómek kórsetýdi eki aptaǵa toqtatty. Sonymen qatar, senbiden bastap barlyq meıramhana, sulýlyq salony men turmystyq qajettilikke jatpaıtyn taýarlardy satatyn dúkender jabylyp, mektepter qashyqtan oqytýǵa kóshedi.
Chehııa Respýblıkasynyń bıligi taǵy da sheteldikterdiń elge kirýin toqtatyp, barlyq adamnyń el ishinde erkin júrýin shekteý qoıdy. Bul bir apta ishinde koronavırýs juqtyrýdyń jańa jaǵdaılarynyń sany elde rekordtyq deńgeıge, 15 myńǵa jetkennen keıin qabyldanǵan sheshim bolatyn. Sársenbiden bastap Chehııada saǵat 9-dan tańǵy 5-ke deıin komendanttyq saǵat engiziledi. Tek jumys isteıtinder men medıtsınalyq kómek kórsetý úshin erekshe jaǵdaılar qarastyrylǵan.
Slovakııa bıligi koronavırýsqa jalpyulttyq testileý júrgiziletinin habarlady. Eldiń barlyq halqy, shamamen 5,5 mıllıonǵa jýyq adam osy demalys kúnderi tekserilmek. Buǵan deıin Slovakııa premer-mınıstri aýrýdy eń kóp juqtyrǵan aýdandarda aldyn-ala testileý sátti ótkenin málimdedi.
Sondaı-aq, Majarstanda ólim kórsetkishiniń jańa rekordy tirkeldi. Seısenbi kúngi tańerteńgi jaǵdaı boıynsha bir táýlikte 63 adam koronavırýstan kóz jumǵan. Olardyń basym kópshiligi egde jastaǵy adamdar men sozylmaly aýrýlary bar patsıentter. Osylaısha koronavırýstan bolǵan ólim kórsetkishiniń sany 1535 adamǵa jetti. Elde jalpy COVID-19 juqtyrýdyń 63 myńnan astam jaǵdaıy tirkelgen.