Koronavırýs: Sımptomsyz eki naýqas úshin Shyńjańǵa kirip-shyǵý shekteldi

BEIJІŃ. QazAqparat – Qytaıda Shyńjań-Uıǵyr avtonomııalyq aýdany Іle Qazaq avtonomııalyq oblysynyń Qulja qalasynda eki adamnyń koronavırýspen sımptomsyz aýyrǵany anyqtalyp, dúısenbi kúni soǵan baılanysty munda kirip-shyǵýǵa ýaqytsha shekteýler engizildi, dep habarlaıdy QazAqparattyń menshikti tilshisi.

Ótken jeksenbi kúni Qytaıdyń Shyńjań-Uıǵyr avtonomııalyq aýdany Іle Qazaq avtonomııalyq oblysynyń Qorǵas qalasynda koronavırýspen sımptomsyz aýyrǵan eki adam anyqtaldy. Soǵan baılanysty Qorǵas qalasynan 90 shaqyrym jerde ornalasqan Qulja qalasynyń áýejaıynda reısterdiń 70% toqtatyldy.

Jergilikti BAQ-tyń habarlaýynsha, dúısenbi kúni Qulja qalasyn Shyńjańnyń basqa eldi mekenderimen baılanystyratyn temirjol jáne avtobýs qozǵalysy toqtady.

Sonymen qatar dúısenbi kúni Úrimji qalasynyń áýe aılaǵynda 165 reıs ushpaı qaldy.

Shyńjańda koronavırýstyń qaıta órshýine baılanysty Gýanchjoý jáne Shenıan sııaqty megapolıster bıligi Qorǵas jáne Qulja qalalarynan kelýshilerden mindetti túrde turǵylyqty jeri boıynsha densaýlyǵy týraly derekterdi usynýdy talap etýde.

Eske sala keteıik, osy jyldyń tamyzynda Qytaıda Shyńjańnyń Borotala-Mońǵol avtonomııalyq oblysynyń Alashańqaı qalasynda koronavırýspen sımptomsyz aýyrǵan adamdar anyqtaldy. Osyǵan baılanysty bir kún ishinde atalmysh avtonomııalyq oblystyń 500 myńǵa jýyq turǵyny indetke qarsy test tapsyrdy.