Koronavırýs: Semeıde oqýshylardy mektepke avtobýspen jetkizý toqtatyldy

SEMEI. QazAqparat – Semeı qalasynda epıdemıologııalyq jaǵdaıdyń turaqtalýyna baılanysty oqýshylardy mektepke avtobýspen jetkizý jumysy toqtatyldy. Bul týraly baspasóz máslıhaty barysynda qalalyq bilim bóliminiń basshysy Natalııa Fesenko málim etti, dep habarlaıdy QazAqparat tilshisi.

Onyń aıtýynsha, Semeıdegi bilim ordalarynda epıdemıologııalyq jaǵdaı turaqty.

«Mektepte barlyq karantındik talaptar saqtalǵan. Eger oqýshylardyń birinen koronavırýs anyqtalsa, onda synyp túgeldeı qashyqtan oqytýǵa kóshirilýde. Dezınfektsııalaý jumystary da turaqty túrde júrgizilip jatyr. 1 qyrkúıekten beri 25 avtobýs oqýshylardy mektepke tasyp otyrǵan. Endi aldaǵy dúısenbiden bastap balalar ózdigimen baratyn bolady. Qoǵamdyq kólikter qaıta qalalyq marshrýtqa oralady», - dedi ol.

Aıta keteıik, qyrkúıek aıynyń basynda shahar «qyzyl» aımaqqa endi. Soǵan oraı 3 myńnan astam oqýshyny kólikpen tasymaldaý uıymdastyryldy.

Qalalyq Aqparat ortalyǵynyń málimetine súıensek, Semeıde turǵyndardy vaktsınalaý jumystary qarqyndy júrgizilýde. Búgingi tańda 213 myń adam vırýsqa qarsy ekpe saldyrǵan.