Koronavırýs: Saılaý kezinde azamattar qalaı qorǵalady

NUR-SULTAN. QazAqparat - 2021 jyldyń 10 qańtaryna taǵaıyndalǵan kezekti Májilis depýtattaryn jáne jergilikti máslıhattardyń saılaýyn ótkizýge 1 aıǵa jetpes ýaqyt qaldy. Búginde elimizdiń basty saıası dodasyna joldama alǵan 5 partııa, atap aıtqanda «Aýyl» halyqtyq-demokratııalyq patrıottyq partııasy», «Nur Otan» partııasy», «ADAL» saıası partııasy», «Aq jol» Qazaqstannyń demokratııalyq partııasy», «Qazaqstannyń Halyq partııasy» kandıdattary elimizdiń túkpir-túkpirin aralap, saılaýshylardy óz jaqtaryna shyǵarýǵa tyrysyp baǵýda.

Bul oraıda saılaýshylarmen qatar elimizdiń densaýlyq saqtaý salasy mamandaryn álemmen qatar qazaq jurtshylyǵyn da ári-sári kúıge túsirgen koronavırýs ınfektsııasyna qatysty ahýal da alańdatyp otyrǵany belgili. Óıtkeni, bul pandemııa aýa arqyly adamnan adamǵa tez juǵady. Al daýys berý kúninde qalaǵan kandıdaty arqyly kóńilinen shyǵatyn partııaǵa daýys berýge asyǵatyn jurtshylyqtyń qarasy saılaý ýchaskesinde qalyń bolary aıtpasa da belgili jaıt.

Mine osyǵan baılanysty elimizdiń Densaýlyq saqtaý vıtse-mınıstri - bas memlekettik sanıtar dárigeri Erlan Qııasov Qazaqstan Respýblıkasy Parlamentiniń Májilisi jáne máslıhattar depýtattarynyń saılaýynda saılaý aldy úgitti júrgizý kezinde COVID-19 koronavırýs ınfektsııasynyń taralýynyń aldyn alý, sanıtarııalyq-epıdemıologııalyq qaýipsizdikti jáne azamattardyń densaýlyǵyn qorǵaýdy qamtamasyz etý maqsatynda arnaıy qaýly shyǵaryp otyr. Bul rette oblystardyń, respýblıkalyq mańyzy bar qalalardyń jáne astananyń bas memlekettik sanıtar dárigerleri oblystardyń, respýblıkalyq mańyzy bar qalalardyń jáne respýblıka astanasynyń aýmaqtyq saılaý komıssııalarymen birlesip, óńirlerdegi sanıtarııalyq-epıdemıologııalyq jaǵdaıdy eskere otyryp, saılaý protsesiniń sanıtarııalyq qaýipsizdigin qamtamasyz etýi tıis.

Atalǵan qaýlyǵa sáıkes, saılaý protsesiniń barlyq qatysýshylary: bir ret qoldanylatyn medıtsınalyq nemese qorǵanysh maskalaryn, qolǵaptardy kııý rejımin mindetti túrde saqtaýy; qoldy dezınfektsııalaý úshin antıseptıkalyq quraldardy paıdalanýy; adamdar arasynda bir-birinen keminde 1,5-2 metr áleýmettik qashyqtyqty saqtaýy; qol alysýdy nemese tikeleı baılanystyń basqa da túrlerin boldyrmaýy qajet. Saılaý aldy úgit is-sharalaryn teledıdar, radıo, baspa basylymdaryn, ınternet-resýrstardy paıdalana otyryp, onlaın rejımde ótkizý usynylady. Saılaý naýqany úshin arnaıy daıyndalǵan tegin baspa materıaldaryn, onyń ishinde ıllıýstratsııalyq materıaldardy, sondaı-aq belgishelerdi, jalaýlardy, jalaýshalardy taratýdy bir ret qoldanylatyn qolǵaptardy jáne qorǵanysh maskalaryn paıdalana otyryp júzege asyrý kerek.

«Saılaý aldy kópshilik is-sharalaryn jáne úı-jaı ishinde saılaýshylarmen jeke kezdesýlerdi ótkizý kezinde: áleýmettik qashyqtyqty múltiksiz saqtaý úshin jetkilikti keń úı-jaılardy paıdalanýdy; is-sharaǵa qatysýshylardyń temperatýrasyn úı-jaıǵa kireberiste baılanyssyz baqylaýdy; úı-jaıǵa kireberiste jáne úı-jaı ishinde qoldy dezınfektsııalaýǵa arnalǵan quraldardy paıdalanýdy; jýý quraldaryn qoldana otyryp, úı-jaıdy jáne barlyq jumys betterine ylǵaldy jınaý júrgizýdi, dezınfektsııalaýdy; jasandy jeldetý júıesi bolmaǵan jaǵdaıda úı-jaıǵa turaqty jeldetý júrgizýdi; ǵımarattyń tehnıkalyq múmkindikteri bolǵan kezde úı-jaıǵa bólek kiretin jáne shyǵatyn joldardy; KVI-diń profılaktıkasy sharalaryn saqtaý týraly aqparattyq materıaldardy ornalastyrýdy; úı-jaıǵa kireberiste jáne úı-jaı ishinde qashyqtyq belgilerin ornatýdy; qatysýshylardy áleýmettik qashyqtyqty saqtaı otyryp otyrǵyzýdy qamtamasyz etý qajet», - delingen qaýlyda.

Aıta keteıik, elimizdiń ortalyq saılaý komıssııasy barlyq 5 partııadan 312 kandıdatty tirkedi. Onyń ishinde: «Aýyl» halyqtyq-demokratııalyq patrıottyq partııasynan 19; «Nur Otan» partııasynan 126; «ADAL» saıası partııasynan 16; Qazaqstannyń «Aq jol» demokratııalyq partııasynan 38 jáne «Qazaqstannyń Halyq partııasynan» 113 adam. Partııalyq tizimder boıynsha Parlament Májilisi saılaýynda daýys berýdi ótkizý kezindegi jerebe qorytyndysy boıynsha saılaý bıýlletenindegi saıası partııalardyń ataýlary mynadaı tártippen ornalastyrylatyn bolady:

1. «Qazaqstan Halyq partııasy» qoǵamdyq birlestigi.

2. «Nur Otan» partııasy» qoǵamdyq birlestigi.

3. «Aýyl» Halyqtyq-demokratııalyq patrıottyq partııasy» qoǵamdyq birlestigi.

4. «Aq jol» Qazaqstannyń demokratııalyq partııasy» qoǵamdyq birlestigi.

5. «ADAL» saıası partııasy» qoǵamdyq birlestigi.

Sonymen qatar 2020 jylǵy 1 jeltoqsandaǵy jaǵdaı boıynsha Saılaýshy azamattardyń biryńǵaı elektrondyq tizilimine sáıkes Qazaqstan Respýblıkasyndaǵy saılaýshylardyń jalpy sanynyń bir paıyzy rezervin qosa, daıyndalýǵa jáne saılaý ýchaskelerine jetkizilýge tıis saılaý bıýlletenderiniń sany partııalyq tizimder boıynsha saılanatyn Qazaqstan Respýblıkasy Parlamenti Májilisiniń depýtattaryn saılaý boıynsha 12038433 (on eki mıllıon otyz segiz myń tórt júz otyz úsh) danany quraıtyn bolyp belgilendi.