Koronavırýs saldary aǵzada uzaq ýaqyt baıqalýy múmkin – Qytaı ǵalymdary

BEIJІŃ. QazAqparat – Koronavırýspen aýyryp, jazylyp shyqqan naýqastarda uzaq ýaqyt boıy ınfektsııanyń saldary baıqalýy múmkin. Mundaı málimdemeni Beıjińdegi Qytaı-Japon dostastyq aýrýhanasynyń Juqpaly aýrýlar ortalyǵynyń dırektory Tsao Bın jasady, dep habarlaıdy «QazAqparat» HAA menshikti tilshisi.

Tsao Bınniń medıtsınalyq toby bir kezderi Qytaıdaǵy COVID-19-dyń taralý oshaǵy bolǵan Ýhan qalasyndaǵy Tszınıntan gospıtalinen emdelip shyqqan 1,7 myń kovıd-naýqasty baqylady. Zertteý nátıjesi kórsetkendeı, naýqastardyń 70% álsizdik, bulshyqetterdiń aýrýy, uıqynyń buzylýy, sondaı-aq býyndardyń aýrýy, tábettiń nasharlaýy, júrý kezindegi qıyndyqtar syndy asqynýlar bolǵan.

Naýqastardyń 30% aerobty múmkindik pen tózimdilikti baǵalaý úshin júrgiziletin 6 mınýttyq júrý testinen ótpeı qalǵan. 20% astam naýqas psıhologııalyq asqynýlardyń bolǵanyn habarlaǵan. Sondaı-aq, jazylyp shaqqan naýqastardyń jartysynan kóbinde KT-dıagnostıkasynyń kem degende bir bóligi boıynsha normadan aýytqý baıqalǵan.

Tsao Bınniń aıtýynsha, COVID-19 aǵzadaǵy jasýshalardyń ólimine, ımmýndyq júıege shabýylǵa ákep soǵyp, qosymsha zııan keltirýi múmkin. Ýhanda indet tarala bastaǵan alǵashqy ýaqytta aýyr jaǵdaıda jatqan naýqastardyń kóbinde polıaǵzalyq jetispeýshilik belgileri baıqalǵan.

Oǵan qosa, zertteý kórsetkendeı, eger naýqastarda antıdeneler neǵurlym jyldam tómendese, olarda ınfektsııany qaıta juqtyrý yqtımaldyǵy soǵurlym joǵary bolady. Osylaısha, bul sanattaǵy adamdardy qaýip tobyna jatqyzyp, bolashaqta medıtsınalyq baqylaýdy muqııat júrgizý qajet.

Tsao Bın áriptesterin COVID-19-dyń uzaq merzimdi saldaryna nazar aýdarýǵa shaqyryp, bar kúshti koronavırýsqa qarsy vaktsına men dári oılap tabýǵa baǵyttaý keregin aıtty.