Koronavırýs: Pandemııa Qazaqstan avıatsııasyna qalaı áser etti

NUR-SULTAN. QazAqparat - Koronanvırýs pandemııasyna baılanysty bıyl Qazaqstan avıatsııasyndaǵy operatsııalyq kirister 300 mlrd teńgege deıin azaıýy múmkin.

Bul týraly QR Indýstrııa jáne ınfraqurylymdyq damý mınıstri Beıbit Atamqulov málimdedi, dep habarlaıdy QazAqparat tilshisi.

«Azamattyq avıatsııada koronavırýs pandemııasyna baılanysty ishki jáne halyqaralyq avıareıster toqtatyldy. Biraq, qalyptasqan jaǵdaıǵa qaramastan, bıyl alǵashqy toqsandaǵy jolaýshylar sany 1,7 mln adamdy qurady. Bul 2019 jyldyń sáıkes kezeńinen 5,2 paıyzǵa artyq», dep atap ótti mınıstr Úkimettiń onlaın otyrysynda.

Áýe tasymaly toqtatylǵan sátke deıin Qazaqstannyń 26 memleketpen 99 halyqaralyq baǵyt boıynsha áýe qatynasy bolǵan.

«Jaqyn arada biz qalypty jumys rejımine oralyp, barlyq ushýlardy qalpyna keltirip, azamattyq avıatsııa salasynda josparlanǵan barlyq mindetterdi oryndaımyz dep úmittenemiz. QR Azamattyq avıatsııa salasy ókilderiniń boljamy boıynsha, jalpy avıatsııa salasyndaǵy operatsııalyq kiristerdiń tómendeýi jyl sońyna deıin 300 mlrd teńgeni quraýy múmkin», - dedi B. Atamqulov.

Aıta keteıik, búgingi Úkimet otyrysynda 2020-2025 jyldarǵa arnalǵan «Nurly jol» ınfraqurylymdyq damytý memlekettik baǵdarlamasyn júzege asyrý barysy talqylandy.

Buǵan deıin Beıbit Atamqulov Qazaqstannyń qaı áýejaılarynda jóndeý jumystary júrgiziletinin baıandady.