Koronavırýs: Ózbekstanda naýqan bastalǵaly vaktsınanyń 12 mln dozasy paıdalanyldy

TAShKENT. QazAqparat – Vaktsına salý naýqany bastalǵaly beri Ózbekstanda COVID-19-ǵa qarsy vaktsınanyń 12 mıllıon dozasy paıdalanyldy, dep habarlaıdy QazAqparattyń menshikti tilshisi.

Ózbekstan Respýblıkasynyń Densaýlyq saqtaý mınıstrliginiń derekteri boıynsha, búgingi kúni elde vaktsınanyń 12 390 770 dozasy paıdalanylǵan. Vaktsınanyń birinshi komponentin 8 728 529 ózbekstandyq alǵan, ekinshi jáne úshinshi (ZF-UZ-VAC2001 qytaı-ózbek vaktsınasy úsh dozamen salynady) komponentin 2 688 219 jáne 974 022 ózbekstandyq saldyrtqan. Vaktsınalaýdyń tolyq kýrsyn 1 435 883 ózbekstandyq ótken.

Óńirler arasynda Ferǵana jáne Namangan oblystary kósh bastap tur. Bul oblystardy vaktsına alǵandar sany 1,4 mıllıonnan asty.

Eske sala keteıik, Ózbekstanda ekpe kampanııasy 1 sáýirden bastaldy. Vaktsınalaý tórt preparatpen júzege asyrylady: eýropalyq AstraZeneca, ZF-UZ-VAC2001 qytaı-ózbek vaktsınasy, reseılik «Spýtnık-V» jáne 1 tamyzdan bastap amerıkalyq Moderna vaktsınasy.

Epıdemıologııalyq ahýaldyń órshýimen baılanysty Ózbekstanda 3 tamyzdan bastap halyqtyń jumys isteıtin bóligin mindetti vaktsınalaýdy quqyqtyq negizde bekitetin zań qabyldandy.

Mádıbek Jánibekov