Koronavırýs: Ózbekstan Aýǵanstanmen shekarasyn japty

TAShKENT. QazAqparat – Ózbekstan eldegi epıdemıologııalyq ahýaldyń nasharlaýynan Aýǵanstanmen shekarasyn ýaqytsha jabady. Sáıkes sheshimdi Koronavırýsqa qarsy is-qımyl jónindegi arnaıy respýblıkalyq komıssııa qabyldady, dep habarlaıdy QazAqparat tilshisi.

«Arnaıy respýblıkalyq komıssııa eldegi epıdemıologııalyq ahýaldy esepke ala otyryp, ózbek-aýǵan shekarasy arqyly azamattardyń qozǵalysyn toqtatý týraly sheshim qabyldady. Sonymen qatar Aýǵanstan azamattaryna týrıstik vızalardy berý jáne týrıstik fırmalardan vızalyq ótinimderdi qabyldaý toqtatyldy», - delingen habarlamada.

Vedomstvo deregine saı, koronavırýs ınfektsııasy anyqtalǵan Ózbekstan azamattary arnaıy aýrýhanalarǵa em alýǵa jiberilip otyrady. Al koronavırýs anyqtalǵan sheteldik azamattar Ózbekstan aýmaǵyna kirgizilmeıdi.

Eske sala keteıik, Ózbekstanda KVI aýrýynyń turaqty ósýi baıqalady. Ótken táýliktiń ózinde 427 adam koronavırýs juqtyrǵan. Tashkent (163) jáne Tashkent oblysy (61) kósh bastap tur. Aýrýhanalarda 3 571 koronavırýs juqtyrǵan naýqas jatyr.

Sonymen qatar, Ózbekstanda sheteldikter úshin mindetti PTR-test júıesi qaıta engiziledi.