Koronavırýs: Ońtústik Koreıadan taǵy bir lıtsenzııalyq jarys ózge elge aýystyryldy

NUR-SULTAN. QazAqparat - Akademııalyq esýden Ońtústik Koreıanyń Chýndjý qalasynda ótetin lıtsenzııalyq Azııa chempıonaty keıinge shegerildi, dep habarlaıdy QazAqparat tilshisi.

Bul týraly halyqaralyq esý federatsııasysynyń resmı málimdemesine súıenip, QR Ulttyq olımpıada komıteti málim etti.

Negizgi jospar boıynsha akademııalyq esýden lıtsenzııalyq Azııa chempıonaty 27-30 sáýir kúnderi Ońtústik Koreıanyń Chýndjý qalasynda ótýi tıis bolatyn. Alaıda, Ońtústik Koreıada koronavırýs epıdemııasynyń jappaı taralýyna baılanysty halyqaralyq esý federatsııasy atalǵan jarysty Shveıtsarııanyń Lıýtsern qalasyna aýystyrý týraly sheshim jasady. Endi akademııalyq esýden lıtsenzııalyq Azııa chempıonaty 17-19 mamyr kúnderi Lıýtsern qalasynda ótedi.

Esterińizge sala keteıik, osyǵan deıin koronavırýstyń taralýynan Ońtústik Koreıa Seýl qalasynda ótedi dep josparlanǵan short-trekten álem chempıonatyn ótkizýden bas tartqan edi.

Aıta keteıik, Ońtústik Koreıa álemdegi koronovırýs taraǵan elder arasynda Qytaıdan keıingi ekinshi orynda tur.