Koronavırýs: «Omıkron» shtamy Reseıdiń 60-tan astam aýdanynan anyqtaldy
Ótken táýlikte elde koronavırýs ınfektsııanyń 49 513 jaǵdaıy tirkelip, 9 136 adam aýrýhanaǵa jatqyzyldy, dep habarlaıdy QazAqparat Covid-19 taralýyna jol bermeý jónindegi vedomstvoaralyq komıssııasynyń Telegram kanalyna silteme jasap.
Naýqastar ásirese Máskeýde kóp anyqtaldy - 15 987, Sankt-Peterbýrgte – 5 922 jáne Máskeý oblysynda – 4 424.
Koronavırýstyń áserinen 692 naýqas qaıtys boldy. Buǵan deıin juqpaly aýrýlar mamany Evgenıı Tımakov Reseıde COVID-19 aýrýynyń joǵary deńgeıi aqpan aıynyń ortasynda bolady dep málimdedi. Máskeýde ol sál erterek bolýy múmkin — qańtardyń aıaǵynda-aqpannyń basynda. Sebebi, «omıkron» shtamynyń ınkýbatsııalyq kezeńi eki-úsh kún, eń kóbi jeti kún, deıdi maman.
AQSh ımmýnologtary zertteý barysynda «omıkron» shtamynyń ózine qarsy ımmýnıtetti tıimdi qalyptastyratynyn anyqtady. Atap aıtqanda, bıologtar covid-19 jańa nusqasymen aýyratyndar koronavırýstyń osy shtamyna qarsy ımmýnıtetti qalyptastyratynyn jáne SARS-CoV-2 basqa nusqalarynan, sonyń ishinde «deltadan» qorǵaýdy ishinara kúsheıtetinin anyqtady.
Ǵalymdar WA1 jáne «delta» shtamdaryn juqtyrǵan tyshqandarda gıpotermııa, letargııa jáne salmaq joǵaltý sııaqty belgiler paıda bolǵanyn atap ótti. «Omıkron» juqtyrǵandar, kerisinshe, qalypty bolyp kórindi, al olardyń tynys joldaryndaǵy vırýstyń replıkatsııasy áldeqaıda tómen boldy.