Koronavırýs: Mobıldi toptar jumysqa qashan kirisedi

NUR-SULTAN. QazAqparat - Halyqqa keshendi medıtsınalyq qyzmet kórsetetin mobıldi toptar qashan jumysqa kirisedi? Bul saýalǵa QR Densaýlyq saqtaý vıtse-mınıstri Ajar Ǵınııat jaýap berdi, dep habarlaıdy QazAqparat tilshisi.

Onyń atap ótýinshe, búkil elimiz boıynsha emhanalar janynan halyqqa medıtsınalyq qyzmetterdi keshendi túrde kórsetetin 465 ámbebap mobıldi top qurylatyn bolady. Al Nur-Sultan qalasyndaǵy 31 emhana janynan árqaısysynda 2-3-ten mobıldi top qurylǵan.

«Jedel járdem stansalarynda da mobıldi top qurý úshin kelisimshart jasaý jumystary júrgizilip jatyr. Olar qormen (Mindetti áleýmettik medıtsınalyq saqtandyrý qory) kelisimshartqa otyryp, sol mobıldi toptardyń jumysyn qamtamamsyz etetin qarajat tabýy kerek. Nur-Sultan qalasynda mobıldi toptar kelisimshart jasalǵannan keıin paıda bolady», - dedi vıtse-mınıstr Ortalyq kommýnıkatsııalar qyzmetindegi brıfıng barysynda.

Sonymen qatar ol barlyq emhanada ókpe qabynýymen aýyrǵan árbir naýqasqa ýchaskelik dárigerler antıbotıkter men qyzý túsiretin dárilerdi beretindigin aıtty.

«Bul dárilerdi retseptimen aqysyz alýǵa bolady. Ol úshin ýchaskelik dárigerdiń nusqaýy men retsepti kerek», - dedi Ajar Ǵınııat.