Koronavırýs: Mobıldi top qandaı jaǵdaılarda úıge keledi

ALMATY. QazAqparat- Koronavırýs belgileri anyqtalǵan adamǵa mobıldi top úıine keledi. Olar COVID-19-ǵa PTR-test alady. Bul týraly Almaty qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova onlaın brıfıng barysynda aıtty, dep habarlaıdy QazAqparat tilshisi.

«Medıtsınalyq baqylaý kezinde baılanysta bolǵan adam koronavırýs ınfektsııanyń qandaı da bir klınıkalyq belgileri bar ekenin aıtsa, zerthanalyq tekserýden mindetti túrde ótedi», - dedi spıker.

Sonymen qatar, ol koronavırýsqa qarsy vaktsınanyń eki komponentin alǵan adam úı karantınine jiberilmeıtinin aıtty.

«Eger ekinshi komponentti alǵannan keıin 6 aıdan aspaǵan bolsa, revaktsınatsııany nemese COVID-19-ǵa qarsy vaktsınatsııanyń tolyq kýrsyn alǵany týraly qujattyq rastaý bolǵan kezde úı karantınine oqshaýlanbaıdy. 7-shi kúni PTR ádisimen COVID-19-ǵa tekserý júrgiziledi. PTR-zertteýdiń teris nátıjesimen úı karantıni aıaqtalady. Eger 7-shi kúni COVID-19-ǵa zerthanalyq tekserý júrgizilmese, úı karantıni oqshaýlanǵan sátten bastap 10 táýlik ótkenge deıin jalǵasady», - dedi Á. Qalyqova.