Koronavırýs: Mańǵystaý oblysynda 215 medıtsına qyzmetkeri ekpe aldy

AQTAÝ. QazAqparat - Mańǵystaý oblysynda osy kúnge deıin 215 medıtsına qyzmetkeri koronavırýsqa qarsy vaktsınalandy. Bul týraly oblystyq Sanıtarııalyq-epıdemıologııalyq baqylaý departamentiniń basshysy Ǵazız Nadýev málim etti, dep habarlaıdy QazAqparat tilshisi.

Onyń aıtýynsha, vaktsınadan keıingi asqynýlar men reaktsııalar tirkelgen joq. Vaktsınatsııa jasalǵan azamattar medıtsınalyq baqylaýda bolady.

«3 aqpan kúni №2 qalalyq emhanada «Spýtnık – V» vaktsınasymen egý bastaldy. Arnaıy esepke alý maqsatynda ekpe alǵan adamnyń elektrondyq pasporty ázirlenedi. Vaktsınatsııaǵa qatysty málimettiń barlyǵy mınıstrliktiń ortalyqtandyrylǵan aqparattyq júıesinde saqtalady», - dedi Ǵazız Nadýev.

Mańǵystaýda 2021 jyldyń 1 qańtarynan bastap oqýshylar arasynda koronavırýs ınfektsııasynyń 70 jaǵdaıy tirkeldi. Onyń ishinde offlaın oqıtyndar – 31, onlaın formatta bilim alatyndar – 39.

Departament basshysynyń sózinshe, oqýshylar arasyndaǵy koronavırýs ınfektsııasynyń 39 jaǵdaıy Aqtaý qalasynda, 12-si Túpqaraǵan aýdanynda, 18-i Munaıly aýdanynda jáne 1-eýi Beıneý aýdanynda anyqtalǵan.

«Munaıly aýdany boıynsha dástúrli formatta bilim alyp jatqan 10 oqýshydan koronavırýs 23-28 qańtar aralyǵynda anyqtalǵan bolatyn. Bul mektepter qazir karantın rejımine aýysty», - dedi Ǵazız Nadýev.

Mańǵystaý oblysynda 2020 jyldyń 27 naýryzynan 2021 jyldyń 17 aqpanyna deıin atalmysh ınfektsııanyń 4170 jaǵdaıy tirkeldi. Onyń ishinde shaǵymmen – 1471 (35%), shaǵymsyz – 2699 (65%) jaǵdaı. Aýrý deńgeıiniń kórsetkishi – 565,9. Sońǵy reprodýktıvti kórsetkish – 0,8. Tósek korynyń kórsetkishi – 20%.

«Epıdemıologııalyq taldaý qorytyndysy boıynsha ınfektsııaǵa shaldyqqandardyń 50% astamy KVI indetin juqtyrǵandarmen tyǵyz qarym-qatynasta bolǵan. Kontıngent kestesine sáıkes, naýqastardyń basym bóligi – jumyssyzdar men zeınetkerler. Bul áli de bizdiń halyqtyń túrli jıyndarǵa, toı-sadaqalarǵa, otbasylyq merekelik sharalarǵa barýynan týyndap otyr», - dedi Ǵazız Nadýev.

Óńirde koronavırýs ınfektsııasyn PTR tásilmen anyqtaıtyn memlekettik jáne jekemenshik 7 zerthana bar. Onyń 1-eýi Ulttyq saraptama ortalyǵy, 5-eýi jekemenshik zerthana (Olımp, Chakýr, Invıvo, Etalon, Alataý Klınık) jáne taǵy bir zerthana Jańaózen qalalyq kópbeıindi aýrýhanasynda ornalasqan. Atalǵan laboratorııalarda barlyǵy 260168 adam tekserildi. Orta eseppen táýligine 705 adam PTR-zertteýden ótedi. Qazir ulttyq saraptama ortalyǵynda 29246 test synamasy bar.

Oblysta 1 qantardan bastap 24 monıtorıngilik top quryldy. 1 qańtar men 17 aqpan aralyǵynda 248 reıd júrgizilip, 2949 nysan tekserildi. Reıd barysynda 11 nysanda buzýshylyqtar anyqtalyp, 9 (6 jeke kásipker, 3 jeke tulǵa) ákimshilik hattama (2 mln. 143995 tg.) toltyryldy.