Koronavırýs: Latyn Amerıka pandemııa epıtsentrine aınalyp barady
Latyn Amerıkadaǵy jaǵdaı dárigerlerdiń úlken alańdaýshylyǵyn týdyryp otyr. Onda koronavırýs jaǵdaılary kúrt ósken. Panamerıkalyq Densaýlyq saqtaý uıymy bul el pandemııanyń álemdik oshaǵyna aınalyp bara jatqanyn málimdedi.
Brazılııada indetke shaldyqqandar sany 3690 myńnan asyp, memleket aýrý deńgeıi boıynsha álemde ekinshi orynǵa shyqty. Basqa elderde, onyń ishinde Meksıka, Chılı jáne Perýda rastalǵan dıagnozdar sany da artyp keledi.
Brazılııada alǵashqy jaǵdaı 26 aqpanda tirkelgen, sodan keıin koronavırýs barlyq aımaqqa taraldy. Latyn Amerıkada 750 myńnan astam naýqas vırýs juqtyrǵan, 40 myń adam qaıtys boldy.
Ólim-jitim deńgeıi Eýropa men AQSh-qa qaraǵanda áldeqaıda tómen bolǵanymen, sarapshylardyń aıtýynsha, munda jasalatyn testilerdiń sany da áldeqaıda az. Sol sebepti vırýsty juqtyrý jáne odan ólim jaǵdaılary tirkelmegen bolýy múmkin. Eń tyǵyz qonystanǵan elderde, onyń ishinde Meksıkada (8 myńnan astam) jáne Brazılııada (24 myń) kóz jumý jaǵdaılary joǵary.
Brazılııada, Meksıkada jáne Perýde ólim sany ár eki-úsh aptada eki eselene artýda.
Panamerıkalyq densaýlyq saqtaý uıymy basshysy Karıssa Etenniń sózinshe, «aımaqtyń pandemııanyń epıtsentrine aınalǵanyna esh kúmán joq».
Sarapshylar Latyn Amerıkanyń birqatar eli indettiń sharyqtaý sheginen ótpegenin atap ótedi. Bul rette, Eýrokomıssııa pandemııadan zardap shekken Eýroodaq elderine kómek retinde 750 mlrd eýro bólmek.
Pandemııaǵa baılanysty ekonomıkalyq daǵdarys EO-ǵa múshe 27 eldiń bárin sharpydy. Degenmen, keıbir memlekette jaǵdaı indetke deıin de nashar edi. Olardyń syrtqy qaryzdary aıtarlyqtaı ósti. Kómekterdiń basym bóligi pandemııadan asa zardap shekken elder Italııa men Ispanııaǵa jiberiledi.
Italııa 170 mlrd eýro, Ispanııa 140 mlrd eýro alady dep kútilýde. Sonymen qatar kómek paketiniń jartysy nesıe túrinde beriledi.
Frantsııa qazirdiń ózinde karantın kezinde jabylǵan avtokólik ónerkásibi úshin 8 mıllıard eýro kólemindegi kómek paketin jarııalady.
Frantsııa bıligi sonymen qatar, koronavırýsty emdeý úshin bezgekke qarsy gıdroksıhlorohın preparatyn paıdalanýǵa tyıym saldy. Óıtkeni ol janama áserlerin tıgizýi múmkin.
Amerıka Qurama Shtattarynda koronavırýsten bolǵan ólimder sany 100 myńǵa jýyqtady. Bul, búkil álem boıynsha kórsetkishtiń tórtten bir bóliginen astamyn quraıdy. Infektsııanyń rastalǵan jaǵdaılarynyń sany 1,7 mıllıonǵa jaqyndap otyr. Bul - búkilálemdik kórsetkishtiń tórtten bir bóliginen astamy.
AQSh prezıdenti Donald Tramp ólim-jitim sany osyndaı bolaryn mamyr aıynyń basynda boljaǵan edi. Dál osyndaı tsıfrlardy naýryz aıynda Tramp ákimshiliginiń keńesshisi, Allergııalyq jáne juqpaly aýrýlardy zertteý ulttyq ınstıtýtynyń dırektory Entonı Faýchı ataǵan bolatyn.
Sarapshylar AQSh-ta koronavırýsty juqtyrý men odan bolǵan ólim jaǵdaılarynyń tym kóp bolýyn birqatar faktormen túsindiredi. Birinshiden, elde málimetterdi jınaý men jarııalaýdyń statıstıkalyq júıesi ashyq jáne oǵan senýge bolady. Sonymen qatar, AQSh-ta keń aýqymdy testileý júıesi júrgizilýde, osy ýaqytqa deıin 15 mıllıonnan astam test tapsyryldy.