Koronavırýs: Qostanaı oblysynda shekteý sharalary taǵy kúsheıtiledi

QOSTANAI. QazAqparat – Vedomstvoaralyq komıssııa Qostanaı oblysynda qosymsha shekteý sharalaryn engizýdi tapsyrdy, dep habarlaıdy QazAqparat COVID-19-dyń taralýyn tejeý máseleleri jónindegi vedomstvoaralyq komıssııa (VAK) aqparatyna silteme jasap.

VAK tóraǵasy, Premer-Mınıstrdiń orynbasary Eraly Toǵjanov jumys saparymen Qostanaı oblysyna bardy.

Vıtse-premer óńirdegi epıdemıologııalyq ahýal jóninde keńes ótkizip, jergilikti memlekettik organdar basshylyǵynyń qabyldanyp jatqan sharalar týraly esebin tyńdady.

Eraly Toǵjanov bıylǵy qarasha aıynan bastap óńirde COVID-19 faktileriniń edáýir ósýi tirkelgenin atap ótti. Qostanaı qalasynda, Jitiqara, Qarabalyq aýdandarynda epıdemıologııalyq jaǵdaıdy turaqtandyrý qajettiligine erekshe nazar aýdardy.

Vıtse-premer óńirdegi epıdemıologııalyq jaǵdaıdy turaqtandyrý boıynsha jergilikti memlekettik organdardyń jumysynyń álsizdigin atap ótip, Densaýlyq saqtaý mınıstrligi usynystarynyń saqtalýyn baqylaýdy kúsheıtýdi tapsyrdy.

Sondaı-aq oblystyń keıbir qalalary men aýdandarynda PTR-testileýdiń bolmaýyn eskere otyryp, bul qyzmettiń oblys turǵyndary úshin qoljetimdi bolýyn qamtamasyz etýdi jedel sheshýdi tapsyrdy.

Eske salsaq, keshe vedomstvoaralyq komıssııanyń kelisimi boıynsha Qostanaı oblysynda 9 qarashadan bastap sanıtarlyq rejımdi qatańdatý jóninde birqatar shara qabyldanǵan bolatyn.

Sonymen qatar, VAK oblys ákimdigine qosymsha shekteý sharalaryn qabyldaýdy, sonyń ishinde Qostanaı – Qaraǵandy, Qostanaı - Almaty baǵyttary boıynsha temir jol tasymaldaryn aptasyna 7-den 3 retke deıin qysqartýdy jáne oblys ishinde jolaýshylar temir jol quramdaryn toqtatýǵa tyıym salýdy (oblys ákimdigi aıqyndaıtyn oryndardy qospaǵanda) tapsyrdy.

Sondaı-aq, óńir basshylyǵyna karantındik rejımdi saqtaý boıynsha monıtorıngilik toptardyń qyzmetin kúsheıtý, sondaı-aq turǵyndar arasynda karantındik rejımdi múltiksiz saqtaý qajettiligi týraly aqparattyq-túsindirý jumystaryn júrgizý tapsyryldy.

Jumys sapary barysynda Premer-Mınıstrdiń orynbasary medıtsınalyq nysandarda, atap aıtqanda Oblystyq aýrýhanada, medıtsınalyq maskalar óndirýshi kásiporynda jáne dári qoımalarynda bolyp, óńirdiń koronavırýstyq ınfektsııanyń yqtımal tolqynyna daıyndyǵyn tekserdi.

Óńirdegi epıdemıologııalyq jaǵdaı Úkimettiń turaqty baqylaýynda.