Koronavırýs: Qazaqstandyq vaktsınaǵa erikti bolý joldary túsindirildi
«Erikti bolý óte ońaı. Almaty, Taraz qalalarynda erikti bolý múmkindigi bar. Qazirgi ýaqytta Almatyda tıisti sertıfıkaty bar birneshe klınıkalyq bazalarda skrınıng jáne eriktilerdi vaktsınalaý júrip jatyr. Qajet bolsa, bizde baılanysýǵa bolatyn nómirler bar», - dep jaýap berdi Bilim mınıstri Ortalyq kommýnıkatsııalar qyzmetinde tilshi suraǵyna.
Aıta keteıik, elimizde QazCovid-in vaktsınasyn klınıkalyq synaýdyń úshinshi kezeńi bastaldy. Onda úsh myń eriktige vaktsına salynatyny habarlandy.
«Biz úsh myń eriktini jınaımyz jáne jyl sońyna deıin olarǵa vaktsına salynady. Qazir de kóptegen eriktiler vaktsınalanyp úlgerdi. Erikti bolý úshin olar mindetti túrde medıtsınalyq tekserýden ótýi kerek. Olar kóptegen egjeı-tegjeıli analızder tapsyrady. Analızden ótken soń kelisim jasalady, sharttar aıtylady jáne ómirdi saqtandyrý máseleleri kelisiledi. Zańnamaǵa sáıkes basqa da nıýanstar bar. Osydan keıin ǵana erikti bolyp, vaktsınalar qabyldaıdy. Ekpe salynǵannan keıin de kelisimde kórsetilgen talaptar bar», - deıdi mınıstr.
Ashat Aımaǵambetov vaktsınanyń birinshi kezeńinde az ǵana ýaqytta kóptegen ótinim kelip túskenin atap ótti.
«Biz kóptegen ótinimderdi qabyldadyq jáne ótinim qabyldaýdy merziminen buryn jabýǵa májbúr boldyq. Ekinshi kezeńde de jaǵdaı shamamen osyndaı boldy. Qazir úshinshi kezeńde kontıngenttiń kóp bolýyna baılanysty eriktilerdi aldyn ala úsh myńnan asyryp jınaǵymyz keledi. Sebebi úsh myń eriktini iriktep alý úshin skrınıng júrgizý óte mańyzdy. Qazir de eriktilerdi qabyldaý jalǵasýda. Erikti bolǵysy keletin azamattar osyndaı quqyq pen múmkindikti paıdalana alady», - dedi A. Aımaǵambetov.