Koronavırýs: Qazaqstandyq ǵalymdar janýarlarǵa arnalǵan vaktsına jasaıdy

NUR-SULTAN. QazAqparat – Bıologııalyq qaýipsizdik máseleleri ǵylymı-zertteý ınstıtýty janýarlarǵa arnalǵan koronavırýsqa qarsy vaktsına ázirleýdi josparlap otyr.

Bul týraly QR Bilim jáne ǵylym vıtse-mınıstri Mıras Dáýlenov aıtyp berdi, dep habarlaıdy QazAqparat.

«Instıtýt (BQMǴZI) aldyna janýarlarǵa arnalǵan COVID-19 qarsy vaktsınany ázirleý mindeti qoıyldy. Janýarlardyń da aýrý juqtyra alatynyn jáne tasymaldaýshy bola alatynyn bilemiz. Olardyń adamdarǵa aýrý juqtyrmaýy úshin osyndaı vaktsına qajet. Sondyqtan ınstıtýt aldyna osy mindet qoıylyp otyr», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Aıta keteıik, erteń 15 sáýirde «QAZVAC» otandyq vaktsınasyn klınıkalyq zertteýdiń úshinshi kezeńi aıaqtalady.

Buǵan deıin spıker eriktilerdiń klınıkalyq zertteýi qalaı ótip jatqanyn aıtyp bergen edi.