Koronavırýs: Qazaqstan qonaqúılerinde 17 myń rezervtik tósek-oryn daıyn tur

NUR-SULTAN. QazAqparat – Densaýlyq saqtaý vıtse-mınıstri Ajar Ǵınııat qonaq úılerden koronavırýstan emdeıtin gospıtal ashý sharalary týraly aıtyp berdi, dep habarlaıdy QazAqparat tilshisi.

«Qazirgi ýaqytta 46 745 tósek-oryn daıyn tur. Rezervtik 17 myń oryndy qonaqúılerde ázirlep otyrmyz. Bul óte az, Nur-Sultandy alsaq, bul qalada Ramada Plaza-ny keńeıtemiz. Onda 200 tósek-oryn bolǵan edi, jappaı qabyldaý bolǵan jaǵdaıda qosymsha 100 tósek qosamyz, oǵan negizinen ortasha naýqastar túsedi. Qazir basqa aýrýlarmen aýyratyn naýqastarǵa shuǵyl jáne josparly kómek kórsetetin aýrýhanalarǵa tıispeý úshin ortasha-aýyr naýqastarǵa osyndaı medıtsınalyq emes nysandardy daıyndap jatyrmyz», - dep túsindirdi Ajar Ǵınııat Ortalyq kommýnıkatsııalar qyzmetinde ótken brıfıngte.

Onyń aıtýynsha, Almatyda kovıdtik gospıtaldar «Almaty Arenada» ornalasqan.

«Almaty qonaqúılerinen gospıtal ashýdyń qajettiligi joq. «Almaty arena» kesheni óziniń tıimdiligin kórsetti. Kem degende naýqastar baqylaýda boldy jáne qarqyndy palata dep atalatyn segiz reanımatsııalyq tósek bar. Medıtsınalyq emes uıymdar halyqtyń tyǵyzdyǵy óte joǵary jerlerde ashylady. Ázirge basqa aımaqtar qolda bar tósek-orynmen jumys isteýde. Búgingi tańda respýblıka boıynsha tósek-oryndar 53 paıyzdy, reanımatsııalyq tósek oryndary 43 paıyzdy quraıdy», - dedi Ajar Ǵınııat.